Чын бакчачылар бакча эшеннән туктап тора алмый, кышын да үзләренә шөгыль табалар. Арча районы Яңа Кенәр авылында яшәүче Дания Шадалиеваның тәрәзә төбендәге “бакчасы” кышын да гөрләп үсә. Дания ханым витаминга бай микрояшеллек үстерү белән күптән шөгыльләнә икән.
— Быел минем тәрәзә төбе бакчасы зурайды. Нинди яшелчә бар, барысын үстереп карыйм. Октябрь азагы, ноябрь башында чәчә башладым. Помидор, кыяр, борыч, баклажан, редис, руккола чәчтем. Редис 1 декабрьгә үсеп җитте, яшел тәмләткечләрне дә өзә башладык, — дип аңлата бакчачы.
— Дания ханым, тәрәзә төбендә үстерү өчен нинди сортлар сайларга? Өйдә яшелчә культураларын, үсемлекләрне ничек тәрбияләргә?
— Өйдә үстерү өчен иртә өлгерешле һәм биек үсми торган сортларга өстенлек бирәм. Редисның “Черрисо Самба F1”, кыярның “Весна F1” корнишоны, әче борычның “Топик F1”, баллы борычның “Черрико нико F1”, “Черрико Рико F1”, “Новогогошары”, томатның берничә төрле сортларын: “Садовая жемчужина”, “Минигольд”, “Мальчик с пальчик” сортларын сыныйм. Шулай ук яшел тәмләткечләр: яфраклы салат “Красавчик”, базилик, мелисса, портулак үсә башлады.
Әлегә өйдә үсемлекләргә табигый яктылык җитми. Лампагыз юк икән, яшелчәләр үстереп булмаячак. 12-13 сәгать лампа белән яктыртам. Чәчәкләрне дә чәчә башладым. Петуния, пеларгония тишелде. Эустоманың орлыкларын үзем ясаган идем, бик тиз чыкты, — ди бакчачы.
Роза НУРГАЛИЕВА.
