Танышу-кавышу турында динебез ни сөйли? Казанның “Саләх” мәчете имам-хатыйбы Тимергали хәзрәт ЮЛДАШЕВ аңлатма бирде.
— Тимергали хәзрәт, Гашыйклар көнендә бер-беребезгә котлау рәсемнәре җибәрү, открыткалар бирешү гаеп эшме?
— Яраткан кешеләребез, парларыбызга ярату сүзләрен әйтер, яхшы мөгамәлә күрсәтер өчен ниндидер датаны көтәргә кирәкми. Рәсүлебез: “Иң хәерлегез — хатыннарыгызга иң күркәм мөнәсәбәттә булганыгыз”, — дигән. Бу күркәм мөнәсәбәт һәр көнне, һәр мизгелдә булырга тиеш.
— Мөселман егет-кызлары арасында да ялгызлык проблемасы бар. Алар ничек таныша?
— Ялгызлык проблемасы хакында ике сүз белән генә әйтеп булмый. Раббыбыз Коръәндә: “Без сезне парлы итеп яраттык”, — ди. Кешеләр гаилә корырга омтылырга тиеш. Бу — Рәсүлебезнең сөннәте. Хәзер социаль челтәрләр дә зур роль уйный. Танышулар күбесенчә алар аша башкарыла дип уйлыйм. Иң мөһиме — шәригать кушкан чикләрне бозмаска. Динебез буенча танышу кыз кешенең мәхрамы (мәсәлән, әтисе, абыйсы), ягъни аның өчен җаваплы булган зат аша башкарылырга тиеш.
— Танышу сайтлары хәләлме?
— Кайсы сайт хакында сүз бара бит. Аларның төрлесе бар дип беләм. Әйткәнемчә, һәр эштә шәригатебез тәртипләрен саклау мөһим.
— Егет кеше өйләнү турында ничә яшьтә уйлый башларга тиеш?
— Балигълыкка ирешеп, тормышны алып бара алырлык кәсебе булган ир-егет гаилә кору хакында уйлана башласа хәерле. Гаилә кору, нәсел калдыру — һәрьяктан караганда да мөһим төшенчәләр. Кеше бу җаваплылыкка омтылырга тиеш. Никахлашу, гаилә кору — сөннәт. Моны хәләл юл белән үтәү кирәк.
— Хәерле хатын яки ир сорап ничек дога кылырга?
— Үз сүзләрең белән Раббыбызга мөрәҗәгать итеп, хәерле мөселман кешесен насыйп итсәң иде, Раббым, дип дога кылу да мөмкин.
— Татарда “унга бар — уңганчы бар” дигән мәкаль бар.
— Монда кешенең үз бәхетен сынап караудан курыкмаска тиешлеге хакында сүз барадыр, мөгаен. Безнең өчен нәрсә хәерле булуын Аллаһы Тәгалә генә белә.
Берәү дә кимчелексез түгел. Ап-ак кәгазь битендәге кечкенә генә бер кара ноктаны күрәбез, ә ак кәгазьгә карап куана белмибез. Кешенең яхшы якларын күрә белергә кирәк. Иң мөһиме — бу бәндәнең Аллаһы Тәгаләгә карата мөнәсәбәтен, тәкъвалыгын, әти-әниләренә, якыннарына нинди мөгамәләдә булуын игътибарга алу зарур. Кешенең күңеле изгелектә, иманлы, холкы күркәм икән, иншаллаһ, ярыннан уңар.
Гүзәл САБИРОВА.
