Кайбер гөлләр өйгә туры килмәскә һәм күпме тырышсаң да, аны үстерә алмаска мөмкинсең икән. Халык арасында “Ир-ат бәхете” дип йөртелгән антуриум — шундый гөлләрнең берсе.
— Ул йорттагы мохитне сизә. Кайчакта, ничек шулай чәчәк аттырасың син аларны, дип сорыйлар. Өйдә тынычлык булмаса, бу гөлне берничек тә чәчәк аттырып булмый, дигән риваять бар, — ди Лаеш районының Кече Елга авылында яшәүче гөлләр үстерүче Зөлфия Сибгатуллина.
Зөлфия тумышы белән Балык Бистәсе районының Күгәрчен авылыннан. Кече Елга егете Илһамга тормышка чыгып, өч бала үстерәләр. Олы уллары Ислам бүгенге көндә армия сафларында хезмәт итә. Кызлары Алия белән Эльвира мәктәптә белем ала.
— Белемем буенча пешекче булсам да, бер көн дә үз һөнәрем буенча эшләргә туры килмәде. Озак еллар кибеттә сатучы булып эшләдем. Ул елларда халыкка төрле тәм-томнар да пешереп саттым. Аш бүлмәсендә кайнау бик ошый, — ди Зөлфия.
Бүген ул элемтә бүлегендә оператор хезмәтен башкара. Эштән бушаган арада өй тутырып гөлләр үстерә.
— Шактый еллар элек сеңлем антуриум гөленең бер ботагын бүләк иткән иде. Ул гөл төптән үрчи башлагач, аларны башка савытларга күчереп утырттым. Тора-бара бу шөгылем кечкенә генә кәсепкә әйләнде, — ди Зөлфия.
Кечкенә гөлләрне чүлмәге белән 300 сумнан якын-тирә авылларга, Казанга илтеп сата ул.
Антуриумнан тыш бу йортта амариллис, бегония, орхидеяның бер төре фаленопсис, алоэ гөлләре үсә.
— Антуриумны бакча туфрагына башта кечкенәрәк гөл чүлмәгенә утыртам. Ашлама кулланганым юк. Бу гөл артык дымны, туры кояш нурларын яратмый. Яфраклары саргаерга мөмкин. Алай да караңгы тәрәзә төбендә дә үсә алмаячак, — дип киңәшләрен бирә Зөлфия. — Антуриумның чәчәкләре кайчак елдан артык та тора. Зуррак савытка утырткан саен, яфраклары да, чәчәге дә эрерәк була.
Зөлфия җәй буе бакчасында да төрле чәчәкләр үстерә.
— Гөлләр, чәчәкләр миңа җан тынычлыгы бирә, аларга сокланып, күңелем ял итә, — ди көннәрен санап, улын армиядән көтүче әни.
Чулпан ГАЛИЕВА.
