Балтач районы Нөнәгәр авылында “Сәлия” чишмәсе хәзер авыл эчендә челтерәп ага. 19 октябрьдә ачылыш тантанасы булган, бәйрәм оештырганнар. Моңа хәтле дә ике чишмәне яңарткан булганнар.
— Заманында чишмә Сәлия елгасы буенда ургылып чыккан. Шуңа “Сәлия” дип йөртелә. Элек өске якта иде, халык аңа бик еш йөрде. Соңрак ләм басты, яраксыз хәлгә килде. Төзекләндерү эшләре төгәлләнде: чишмә, 400 м торба сузып, авыл эченә китерелде, — дип сөйли Нөнәгәр авыл җирлеге башлыгы Илһам Закиров. — Әлеге зур эш дәүләт программасы буенча түгел, үзара салым акчасын да тотмадык, иганәчебез булышлыгы белән башкарылды. Авылдашыбыз, Росприроднадзорның Идел-Чулман төбәкара идарәсе һәм Балтач районы якташлар җәмгыяте җитәкчесе Фаяз Фәнил улы Шакиров иганәчелек итте. Бөтен чыгымнарны ул күтәрде. Авыл халкы исеменнән зур рәхмәт. Балтач егетләре — подрядчы оешма килеп эшләде. Чишмә янында күл дә бар. Кышын шунда балык җибәрделәр. Әтиләр көнендә уха пешереп, авылның ир-егетләрен сыйладык. Матур итеп эшләнгән чишмәбез тәмле суы белән сыйлап кына калмый, ул — күпләрнең яраткан ял итү урыны да. Чишмәләрне авыл халкы, мәктәп коллективы, балалар чистартып тора. Өмәләр дә оештырабыз.
Лилия ЙОСЫПОВА.
