Казанда яшәүче терапевт, кардиолог Альбина Шаһидуллина декрет ялында үзенчәлекле шөгыль тапкан — эпоксид сумаласыннан төрле бизәнү әйберләре: түштамга, алка, сувенирлар ясый башлаган.
— Минем өчен бу үземне башка өлкәдә сынап карау иде. Яраткан шөгылем керем дә китерә башлагач, тагын да күңеллерәк булды, — ди әңгәмәдәшем.
Үзе өчен генә ясаган эшләнмәләрен сатып алырга теләүчеләр арткан.
Альбина ясаган эшләнмәләрнең нигезендә эпоксид сумаласы. Төп үзенчәлеге — ул аларга табигый элементлар: кипкән яфраклар, чәчәкләр, нарат күркәсе һ.б. куша. Кайсыларын алтынсу, көмеш төс белән бизи.
— Үзем табиб булгач, эшләнмәләрнең сәламәтлеккә зарарсыз булуларына, экологик яктан чиста продуктлардан әзерләнүенә игътибар бирәм. Алар аллергия китереп чыгармый торган табигый әйберләрдән ясала. Көмеш, медицина корычы кулланам, — ди Альбина.
Кечкенә генә түштамганы ясар өчен биш көн вакыт китәргә мөмкин икән. Оста күңел җылысын биреп эшли. Сумала катсын өчен дә вакыт кирәк. Аннары кытыршы җирләрен шомарта. Барысын да кулдан эшли.
— Эшләнмәләремне башта үземдә сынап карадым, бүләк итә идем. Аннары фотоларын социаль челтәргә урнаштырдым. Телеграмда үз каналыбызны булдырдык. Шуны күреп, танышларым сорый башлады. Беренче заказлар барлыкка килде. Әйтик, кардиологлар йөрәк формасындагы түштамгалар ясавымны үтенде. Хәзер эштә шуны тагып йөриләр. Күпләр “сарафан” радиосыннан ишетеп белә. Россиянең башка шәһәрләреннән дә кызыксынып шалтыратучылар бар. Хәтта Азиядән сораучылар булды, — дип сөйли әңгәмәдәшем.
Интернетта бу шөгыль хакында мәгълүмат җитәрлек булса да, түштамга, алка үрнәкләрен, бизәкләрен әңгәмәдәшем үзе тудыра. “Шул рәвешле эшләнмәләр тагын да үзенчәлеклерәк, кабатланмас була”, — ди Альбина.
Эльвира МОЗАФФАРОВА.
