Вакытның бер минутын да юкка сарыф итмәскә! Зәйдән оста куллы Рузилә Нефедова шундый девиз астында яши. Аның тылсымлы куллары бер эштән дә курыкмый. Курчаклар өчен милли күлмәкләр тегә, күз явын алырлык картиналар да ясый ул.
— Тумышым белән Ютазы районы Көрәш-Бүләк авылыннан, — дип сүз башлады Рузилә апа. — Октябрьск шәһәренең 17 нче мәктәбен тәмамладым. Анда хезмәт дәресендә безне тегәргә өйрәттеләр. Казанның элемтә техникумына укырга кердем. Аннан Чаллыга “КАМАЗ”га юллама белән җибәрделәр. Булачак ирем Вячеслав белән дә шунда таныштык. Ул — Зәй районы егете. Бераздан Зәйгә күченеп кайттык. Лаеклы ялга чыкканчы, телефон станциясендә электромеханик булып эшләдем. Төнлә дә сменаларга чыгарга туры килә иде. Эштән бушаган арада балаларыма, дусларыма киемнәр тектем. “Крестьянка” журналында басылган эскизлардан бик теләп файдаландым.
— Сезнең коллекциядә йөздән артык курчак. Ничек ясый башладыгыз?
— Олы кызым Оля Түбән Камада тәрҗемәче булып эшли. Берсендә зур гына оешмага Германиядән кунаклар килгән. Кызым шуларга рус һәм татар милләтеннән курчаклар ясап бирүемне сорады. Кунаклар бу истәлекле бүләккә бик сөенгән. Мин курчакларны сатып алам яки танышларым бүләк итә. Күлмәкләрне тегәр алдыннан һәр милләтнең үзенчәлекләрен өйрәнәм. Коллекциямдә якут курчагыннан алып Чукотка кызына кадәр бар.
Рузилә Нефедова картиналар да ясый, табигать күренешләрен төшерергә ярата. Тәрәзә артындагы пейзаж, һәр ел фасылындагы урман илһамландыра аны. Үзенең кул эшләрен бүләк итеп бирергә ярата. Сәйләннән башкарган эшләре дә күз явын алырлык. Тиздән
70 яшен тутырачак Рузилә апага үз яшен биреп тә булмый. Картаймауны ул хәрәкәттә, спорт белән шөгыльләнүдә күрә. Җәй көне үзләренең йортын һәм тагын 10 подъездны үз акчасына шау чәчәккә күмә. Вячеслав абый белән ике кыз үстергәннәр. Хәзер оныкларына да ул — яраткан дәү әни.
Арыслан ГӘРӘЕВ.
