Зәй районы Кәрәкәс авылында яшәүче Әмир Вазагиев күп еллар дәвамында агачтан төрле җиһазлар ясарга ярата. Алар башкаларныкын кабатламый, һәрчак берәр төрле үзенчәлеге белән аерылып тора. Әмир абыйга хәтта кошлар да чиксез рәхмәтле. Ул эшләгән кош оялары үзе бер сәнгать әсәренә тиң. Канатлы дуслары аңа рәхмәт сүзләрен сайрап белдерә.
— Авыл мәктәбен тәмамлаганнан соң, Чаллыда автокранчы һөнәренә укыдым, — дип сүз башлады Әмир абый. — Армиядә хезмәт итеп кайткач, “КамАЗ” заводына эшкә урнаштым. Ул чагында эш урыныннан кечкенә генә булса да торак бирәләр иде. Туган як барыбер үзенә тартты. Кәрәкәскә кайтып, иске йорт янәшәсендә яңасын салып чыктык. Лаеклы ялда кешенең икенче сулышы ачыла икән.
— Әмир абый, агач эшенә хирыслык ничек башланды?
— Кечкенәдән агачтан ясалган нинди дә булса җиһаз күрсәм, аңа кызыга идем. Үсә төшкәч, пәке яки пычак белән агачны юна-юна нәрсә дә булса китереп чыгарганымны хәтерлим. 1999-2015 елларда төзелештә эшләдем. Өйләр, мунчалар сала идек. Чаллыда гомер иткәндә, өй, мунча, арба, тегермән макетлары ясадым. Туган нигеземнең дә макетын ерып чыктым. Хәзер инде аларны зуррак итеп эшлим. Заводта көч куйганда ук, агачны эшкәртү уңайлы булсын өчен, үз сызымым буенча циркуляр станок булдырдым. Чөнки станокта эш күпкә тизрәк бара. Гаражны остаханә итеп үзгәрттем. Тәүлекнең күп вакыты шунда уза. Соңгы вакытта бакчаны бизәү өчен кое, тегермән, арба, кашполар, урындык, өстәлләр, сандык, вазалар, балалар җиһазы, кошларга бизәкләп эшләнгән җимлек, сыерчык оялары ясыйм. Сыерчык ояларына килсәк, аларны 25 ел эшлим инде. Елына 100 сыерчык оясы ясаган вакытлар да була. Аларны нарат, чыршы агачыннан әзерлим. Кош оялары тулысынча экологик чиста булсын өчен, иссез буяу сатып алам. Чөнки кошлар кискен исне яратмый. Мунча өчен кирәк-яракларны эшләгәндә, юкә, усак, имәнгә тукталам. Кул эшләрен кирәк кешеләр сатып ала, заказ бирүчеләр дә бар. Бер генә кешенең дә гозерен кире какмаска тырышам.
Әмир абыйны хатыны Рима апа илһамландырып, канатландырып тора. Рима апа — Оренбург өлкәсе кызы. Ике балалары, дүрт оныклары — төп шатлыклары. Вагазиевлар бер-берсен ярты сүздән аңлап яши. Шулай булмаса, 41 ел гомер бер мизгел кебек узып китмәс иде. Рима апа үзенең җырлары белән ирен сөендерсә, Әмир абый кул эшләре белән күңелләрне җылыта. Матурлыкны күреп кенә калмый алар. Башкалар белән дә теләп бүлешә беләләр. Җәй җитсә, ишегалды шау чәчәккә күмелә.
Арыслан ГӘРӘЕВ.
