Арча районының Курса Почмак авылыннан ерак түгел “Курсави чишмәсе” бар. Кизләү мәшһүр дин белгече Габденнасыйр әл-Курсави исеме белән бәйле.
1776 елда Курса авылында туып, хәзерге Кукмара районына караган данлыклы Мәчкәрә мәдрәсәсендә белем алганнан соң, ул Бохарага белем тупларга киткән. Курсага кайтып, мәдрәсәдә укытканы да билгеле. Аннары ул кабат Бохарага юл алган. Анда исламга карата булган реформаторлык карашларын тараткан. 1812 елда хаҗ сәфәре вакытында Истанбулда үлгәне һәм “Өскедар” зиратында җирләнгәне билгеле. Туган ягында аның истәлеге булып ул имамлык иткән мәчет һәм чишмә генә калган.
Бу кизләүне 2017 елда “Таттелеком” компаниясенең элекке җитәкчесе Лотфулла Шәфигуллин ярдәме белән Арча филиалы элемтәчеләре төзекләндергән. Биредә ял итү урыны да бар. Анда эскәмияләр куелган һәм төрле акыл ияләренең Габденнасыйр Курсавига карата әйткән фикерләре урын алган. Чишмә бакчасындагы кечкенә мәчетне хәтерләткән, нараттан эшләнгән манаралы бинага Курсавиның фотосы урнаштырылган. “Курсави чишмәсе” суы белән юынгач, көч артып киткәндәй була. Элек яңгыр яуса, монда керү бик авыр иде, ремонттан соң кизләүгә төшү юлына таш түшәлде. Бу тарихый чишмәне туристларга да оялмыйча күрсәтә алабыз”, — ди Арча халы.
Эльвира МОЗАФФАРОВА.
