НОРЛАТ ӘБИЛӘРЕ 500 МЕҢ СУМ ГРАНТ ОТКАН
Яшел Үзән районының Норлат авылы әбиләре Россия Президентының 500 мең сум грантын откан. Бу акчаны авыл туризмын үстерүгә тотачаклар. Беренче туристларны майда каршы алырга җыеналар.
Әбиләр дисәм дә, сөбханалла, кызлардан ким түгел алар. Алты ел элек оешкан төркемнәре дә “Яшь йөрәкләр” дип атала. Иң яшенә — 50, иң олысына 83 яшь. Картаерга вакытлары юк: сәяхәт итәләр, фитнеска йөриләр, боулинг уйныйлар, җәй көне велосипедта җилдерәләр, бассейнда йөзәләр, кыш көне чаңгы, чана шуалар. Үз хорлары бар, җырлыйлар, бииләр. Сәламәт яшәү рәвеше алып баручы пенсионерлар “Россия 1” каналындагы “О самом главном” тапшыруында да чыгыш ясап кайттылар.
Төркем җитәкчесе Ләлә Хаҗипова авылның киләчәге өчен борчылып, шәһәрне ташлап, Норлатка кайтып төпләнгән. Пенсия яшендәге авылдашларын бергә туплый алган. “Яшь йөрәкләр” төркеме белән Болгар, Биләр, Йошкар-Ола, Санкт-Петербург, Алабугага сәяхәткә барганнар. Концерт, театр, музейлардан рухый азык алып кайталар. Норлат спорт комплексында аэробика белән шөгыльләнәләр. Авылда скандинавия йөрешен дә алар популярлаштырган. “Физик күнегүләр ясагач, буыннар язылып китә, авырулар онытыла”, — ди 83 яшьлек Фәрдәнә Хәялиева. Ул әле хәзер дә шпагатка утыра, күз тимәсен. Наилә Мифтиханова: “Яшь йөрәкләр”гә йөри башлаганнан бирле үземне ялгыз хис итмим. Аралашу, үзеңнең кемгәдер кирәклегеңне, дусларың барлыкны тою җиңеллек бирә”, — ди.
Ил буенча гражданлык җәмгыяте үсешенә өлеш керткән иң нәтиҗәле социаль проектларны финанслау белән шөгыльләнгән фондтан “Яшь йөрәкләр” төркеме инде икенче тапкыр грант ота. 2018 елда 15 велосипед, чаңгы, скандинавия таяклары, флешкалар, музыка колонкасы, скакалка, башка кирәк-яраклар алганнар, сәхнә күлмәкләре тектергәннәр. Бу юлы исә акчаны авылда туризмны үстерүгә тотарга җыеналар. Әлеге өлкәдә тәҗрибәләре бар. Берничә тапкыр Әстерхан туристларын кабул итәргә туры килгән аларга.
— Безнең “кыз”ларныкүреп, туристлар шаккатты. Өлкән яшьтәге әбиләр аланда милли уеннар оештырдык, гореф-гадәтләребез белән таныштырдык. Татар җырларын ишеттердек, мөнәҗәтләр әйттек. Бал, үзебез җитештергән эко-продуктлар белән сыйладык. Кунаклар яшел чирәмдә яланаяк йөреп, такыялар үреп, фотога төште, — дип сөйли Ләлә Хаҗипова.
Быел беренче туристлар җәй башында килер дип көтелә. Аланлыкта 60 кешелек җәйге йорт бар, берничә көнгә килгән кеше апийорт дип аталган, бал кортлары энергетикасы белән дәвалана торган җайланмаларда сәламәтлеген ныгыта ала, туристларга массаж тәкъдим итәчәкләр. “Яшь йөрәкләр” төркеменә йөрүчеләр кан басымын төшерү, ябыгу, буыннарны язу өчен үзләре сынаган күнегүләр өйрәтә. Сабан туе оештырырга ниятлиләр. Осталык дәресләре дә каралган.
— Декупаж белән куна тактасы ясау, калфак тегү буенча осталык дәресләре оештырабыз. Кызлар үзләре җитештергән продукцияне туристларга тәкъдим итә алачак. Аш-су осталары да җитәрлек. Кунакларны кош теле, өчпочмак кебек үзебез пешергән милли ризыклар белән сыйлаячакбыз, — ди Ләлә ханым. Җәен урам бәйрәме, “Бәрәңге фест” оештырырга ниятлиләр.
Грант оту бер дә җиңел түгел икән. “Баланы әни йөрәк астында йөрткән кебек, проектны да айлар дәвамында күңелдә үстерәсең, фикерләрне төнлә торып та терки идем. Грант акчалата бирелми. Аны максатчан куллану шарт. Һәр тиен өчен хисап тотарга кирәк”, — ди Ләлә Хаҗипова.
Ул Норлатны туристлык үзәгенә әйләндерергә тели.
— Башкаларга күрсәтерлек урыннарыбыз җитәрлек. Авылыбызның зур тарихлы музее, Ачасырда Каюм Насыйри исемендәге архитектура-этнография комплексы, “Изгеләр чишмәсе” бар. Төркемебезгә күбрәк авылдашларны җәлеп итәсе килә. Кеше ялгыз калгач, пенсиягә чыккач боега. Гел телевизор каршында хәрәкәтсез утырып, гәүдә авырлыгы да артырга мөмкин. Аннары тагын да кәефсезләнә башлый. Ә бергә саф һавада йөрү, физик күнегүләр ясау, күмәк проектларны тормышка ашыру берләштерә, кәефне күтәрә, сәламәт булырга ярдәм итә, — ди Ләлә Хаҗипова.
Эльвира МОЗАФФАРОВА.
