Кайвакыт күңелеңне бушату, киңәш алу бик мөһим. “Гаилә” мәчетендә Бөтенроссия “Гаилә” ышаныч телефоны эшли башлады. Ышаныч телефонының эшчәнлеге турында “Гаилә” мәчете имам-хатыйбы Рөстәм хәзрәт ХӘЙРУЛЛИН белән сөйләштек.
— Рөстәм хәзрәт, ышаныч телефонына ихтыяҗ бармы?
— Мәчеткә кеше дини сораулар белән генә түгел, гаиләгә бәйле башка мәшәкатьләр белән дә мөрәҗәгать итә. Бала хакына гаиләне саклап калыргамы, үсмер тыңламаса нишләргә, кебек сораулар бирәләр. Мөмкинлектән чыгып, вәгазьләр сөйләп ярдәм итәргә тырышабыз. Кешенең күзенә карап сөйләргә уңайсыз мәсьәләләр була. Шуңа да кеше күңелен борчыган проблемаларын аноним рәвештә җиткерә алсын өчен, ышаныч телефонын булдырдык.
— Шалтырату бушлаймы?
— Россиянең төрле почмагыннан бушлай шалтырата алалар. Узган ел “Гаилә” мәчете республикакүләм бәйгесендә “Гаилә кыйммәтләрен саклау буенча татар телле проектларны тормышка ашыручы иң яхшы мәчет” номинациясендә беренче урынны алган иде. Шул бәйгедә бирелгән премия акчасына ышаныч телефонын эшләтеп җибәрдек.
— Халыкны күбрәк нәрсә борчый?
— Көненә 100 гә якын сорау кабул итәбез. Аларга югары белемле психологлар, дин галимнәре җавап бирә. Русча, татарча сөйләшү мөмкинлеге бар. Сораулар күптөрле. Ирем кыйный, дип тә шалтыраталар, күпләрне аерылышу мәсьәләсе борчый. Дин белән кызыксынучылар шактый. Кешегә ярдәм итү мөмкинлеге булдырганы өчен, Аллаһка бик рәхмәтлебез.
Эльвира МОЗАФФАРОВА.
Ышаныч телефонына 10.00-17.00 сәгать аралыгында 8-800-222-05-62 номеры буенча шалтыратырга була.
