— Балаларыбыз аерым фатирларда тора. Мин исә үз йортым белән яшим. Өйне балалар исеменә яздырасым килә. Ничек отышлырак булыр икән: варис итеп билгеләргәме, әллә “бүләк итү” кулайракмы? Алар әлегә фатирлары өчен 13 % салымны кайтара. Бүгеннән милекне бүләк итеп яздырсам яки балаларны йортыма варис итеп теркәсәм, бу очракта 13 % акчаларын кайтару процессы тукталмасмы?
Зөлфия апа, Саба районы.
Саба районы нотариусы Наилә ЙОСЫПОВА:
— Бүләк итү белән варис итеп калдыруның аермасы бар. Әмма кайсы очрак отышлырак дип, кешегә төгәл киңәш биреп булмый. Чөнки һәркемнең үз шартлары бар. Кемгәдер исән чагында ук милкен бүләк итеп кую әйбәт. Бу якыннары өчен (әти-әни, ир-хатын, балалар, оныклар, ир яки кыз бертуганнар) бушлай була. Калган очракта бүләкне кабул итүче милек суммасыннан 13 % салым түләргә тиеш. Ә варис итеп калдыру кеше үлгәч кенә үз көченә керә. Анда 13 % салым түләү юк. Әмма бу очракта искәрмә бар: мәҗбүри өлеш дигән пункт каралган. Варис итеп кемне яздым, шул кешегә генә күчәчәк, дип булмый. Башка мирасчыларга да өлеш чыга ала. Моны клиентларга мирасның өлешләрен исбатлаган чакта аңлатабыз. Бу очракта бүләк итеп калдыру әйбәт дияр идең. Тик, әйткәнемчә, тормышта төрле хәлләр күзәтелә. Бүген бүләк итте, ә иртәгә нидер үзгәрә. Сирәк булса да, практикада бүләк иткәннән соң үзенә бу йортта урын калмаган очраклар да бар. Шуңа һәркем үзе хәл итә.
Федераль салым хезмәтенең ТР буенча 5 нче районара инспекциясенең бүлек җитәкчесе Мөнир ШӘЙДУЛЛИН:
— Балаларына йорт бүләк итеп бирелүнең яки варис итеп күчүнең фатирлары өчен 13 % салым кайтаруга бер тәэсире дә юк.
