Озак еллар Азнакайда гомер итеп, бүген Казанда улы һәм килене тәрбиясендә яшәүче Хәдичә әби Шәйдуллинага 103 яшь тулды. Туган көне быел аеруча истә калырлык булган. Татарстан Президенты Рөстәм Миңнеханов исеменнән котлау хаты килгән. Аннан, әбекәйдә “Ак Барс” хоккей командасының капитаны Данис Зарипов кунак булган.
Хәдичә әби “Ак Барс” хоккей командасының электән тугры тамашачысы икән. Гел җан атып, уенчылар белән кызыксынып тора. Бу хакта белгәч, танылган хоккейчы Данис Зарипов: “Туган көнегезгә килик әле”, — дип үзе мөрәҗәгать иткән. Хәдичә әбигә истәлеккә 103 номеры куелган, Шәйдуллина дип язылган “Ак Барс”ның махсус футболкасын бүләк иткән.
— Гаиләгез, якыннарыгыз гел яныгызда булсын. Барыгызга да бәхет телим, — дип тапшырды Данис бүләкне.
— Хоккейны бик яратам. Теләгем — быел “Ак Барс” чемпион булсын! — дип җавап кайтарды Хәдичә әби.
— Хәдичә апа “Ак Барс” уеннарын калдырмаска тырыша иде. Бөтен уенчыларның фамилияләрен белә, аеруча Данис Зариповны яхшы таный, — ди Хәдичә әбинең бертуганының оныгы, “Халкым минем” тапшыруын алып баручы Ләйсәнә Садретдинова. — Хәдичә апаның оныкларының балалары хоккейга йөри. Аның “Ак Барс” уенчыларыныкы кебек шарф бәйләп төшкән фотосы да бар иде. Балалар шушы фотоны куеп, әбиләре турында социаль челтәрдән язып җибәргән. Уенчылар моны күргән. Данис Зарипов, килик әле, дип шалтыраткан. Бу апабызга гына түгел, барыбыз өчен дә зур сюрприз булды.
Хәдичә апа балалары янәшәсендә бәхетле картлык кичерә. Сәламәтлеге яхшы. Үз-үзен карый, туклануы да әйбәт. Һәр туган көнгә шөкер итеп яши.
Лилия ЙОСЫПОВА.
