Өйдә төрле яшелчәләр үстереп, аларны җәй көне бакчага утыртучыларны, төрле матур чәчәкләр, гөлләр үстерүчеләрне күреп, без инде ияләнгән. Ә экзотик җиләк-җимеш агачларын өйдә үстерүчеләрне, бәлки, ишетеп тә белмибездер. Башкортстанда яшәүче Сагира ханым Габитова өендә экзотик үсемлекләр, җиләк-җимеш агачлары һәм яшелчә культураларын үстерү белән шөгыльләнә. “Яхшы уңыш алу өчен бары тик теләк һәм тырышлык кирәк”, — ди оста хуҗабикә.
5 ел элек ул экзотик үсемлекләр белән кызыксына башлаган. Бүген Сагира ханым өендә икешәр төрле сорт гранат, муррайя, дүрт төр лимон, мандарин, әфлисун, җиде төп биек лавр, дүрт кофе агачы, мушмула, бүлмә чиясе, виноград, дүрт савыт фейхоа, карбыз, җир җиләге үстерә. Шулай ук помидор һәм кыяр да читтә калмый.
— Иң беренче гранат үстердем. Үземә ошаган экзотик үсемлекнең орлыгын табып, үстереп карарга яратам. Үстерү, җимеш бирә аламы — шунысы кызык, — ди ул.
Сагира ханымның танышлары да, кызыксынуын белеп, аңа экзотик үсемлекләр алып килә икән.
— Үсентеләр яхшы үссен өчен, тәрбия, яктылык, витаминнар һәм аларны ярату кирәк, — ди Сагира ханым.
Бакчачы 14 төр борыч үстергән. Алар безнең якларда булмаган, беркем үстермәгән борычлар.
Экзотик үсемлекләрне, яшелчә, җиләк-җимешләрне Сагира ханым дусларына, туганнарына бүләк итә. Үзләре дә сыйлана. Күптән түгел мандарин һәм лимон уңышын җыйганнар. Иң зур лимон 600 грамм булган.
— Хәзер гуава, банан, мирт, папайя, питахайя, помело кебек экзотик үсемлекләр белән кызыксынам, — ди хуҗабикә.
Тырышкан табар, ташка кадак кагар, дип белми әйтмәгәннәр. Теләге булган һәр кеше әлеге үсемлекләрне үстерә ала, дип саный Сагира ханым.
Альмира МӘҮЛЕТОВА.
