Арахисны ничек үстерәләр, язып чыкмассызмы икән?
Тәскирә.
Арахис — җылы климат үсемлеге, шулай да җаен белгәндә, аны Татарстан шартларында да үстереп була. Теплицада яхшырак уңыш бирә. Көздән 1 квадрат метрга 3-4 кг исәбеннән черемә кертеп, тирән итеп казып калдырырга кирәк. Язын рәт арасын 60-70 см калдырып, 10 см тирәнлектә канау казыйлар. Болай үсемлекне чәчәк атканда күмүе уңайлы булачак, чөнки арахисның чикләвекләре җир астында үсә.
Чәчәр алдыннан арахисларны 2 сәгатькә марганцовканың куе алсу эремәсенә салып торалар. 10 см тирәнлектә җир 15 оСка кадәр җылынганын көтегез. Чикләвекләрне 8-9 см тирәнлеккә бер рәткә 15 см саен чәчәргә һәм туфракны азрак тыгызларга кирәк. Чәчкәннән соң җир дымлы торырга тиеш.
Берничә тапкыр төбен өегез: чәчәк атар алдыннан һәм икенчесен чәчәк ата башлагач 10-12 көннән. Арахисның чәчәкләре җиргә күмелә башлый. Августка кадәр 10-12 көн саен төбенә аз-азлап туфрак өстәп торырга кирәк. Өченче өю август башында булырга тиеш.
Арахис сентябрь азагы-октябрь башларында өлгерә. Казып, туфрагын кагарга һәм 5-6 көн җиләс күләгәле урынга элеп киптерергә кирәк. Аннан кузакларын җыеп, коры җылы урында киптереп бетерәләр һәм чистартып, тукыма капчыкка тутырып сакларга салалар.
Франс ХӘЛИЛОВ, авыл хуҗалыгы фәннәре кандидаты, ТРның атказанган авыл хуҗалыгы хезмәткәре. 
