Язның иртә килүе бал кортларына ничек йогынты ясаган? Быел умартачылар нинди уңыш фаразлый?
Дания ЗИННӘТУЛЛИНА, Сарман авылы:
— Хуҗалыгыбызда 5 баш умарта бар. Кышны яхшы чыктылар. Бал кортлары яз көне бик ачыккан була. Шунлыктан аларга ширбәт бирдек. Хәзер үги ана яфрагы, тузганак чәчәк атты. Соңгысын бал кортлары аеруча ярата. Тузганак балын берничә тапкыр аертып карадык, ашап туймаслык! Аннан соң ояларын еш чистартырга тырышабыз. Умарталарны ел саен буямыйбыз. Чөнки бал кортлары оя күчереп йөрткәнне өнәп бетерми. Узган ел буш ояга ике күч килеп керде.
Дания ЙОСЫПОВА, Кукмара районы Төркәш авылы:
— Бал кортлары кышын бик әйбәт торган. Умарталарны чыгардык, чистарттык. Ашарларына бераз бал бирдек. Шушы көннәрдә бер умартадан икенчесенә бал кортларын күчермәкче булабыз. Безнең якта табигать искиткеч матур. Узган елгы кебек быел да бал уңышы сөендерер дип ышанасы килә. Иң мөһиме — корылык кына булмасын!
Илдар ГАЙНУЛЛИН, Самара өлкәсе Камышлы авылы:
— Умарталарны бакчага 17 мартта алып чыгып, рәт-рәт итеп тезеп куйдык. Быел әйбәт кышладылар. Чөнки кыш салкын, гыйнвар коры булды. Юеш, яңгырлы, дымлы һава торышы бал кортларына начар тәэсир итә. Андый вакытта умартадагы баллары да ачый башлый.
Эксперимент буларак, 12 рамлы ояда 2 гаилә тота башладым. Бу кортлар оядан бер-берсен куып чыгарып, майда ук иртә уңыш алу өчен кирәк. Бал корты өчен оя һәм рамнарны үзем ясыйм. Кырларга ел саен агу сибәләр. Умартачыларга игътибар юк, кисәтеп тә тормыйлар. Шуңа да зур кырлар янында умартачылык белән шөгыльләнү куркыныч. Умарта ояларын машинага төяп, тауларга чүнниккә урнаштырабыз. Бал кортлары шунда якын-тирә юкә агачларыннан бал җыя. Быел нинди уңыш алырбыз — барысы да Ходай кулында.
Газинур РИЗВАНОВ, Зәй районы Аксар авылы:
— 7 ел инде умарталар тышта махсус технология буенча кышлый. Ояларына термокамералар урнаштырам. Ул җайланма ояны җылытып тота. Умарта оясы читләренә тишекләр ясадым. Анысы дымланмас өчен кирәк. Аллаһка шөкер, бал кортлары быел бик яхшы кышлады. Арада сирәк кенә үлгәннәре дә бар. Ләкин куркыныч түгел. Язның иртә һәм матур килүе умарта кортлары өчен уңышлы булыр дип өметләнәбез.
Руслан ХӨСНЕТДИНОВ.
Фотода — Илдар Гайнуллин умарталыгы
