«Аңлашып яшәгәндә генә уртак тел табып була”, — ди Апас районы Акхуҗа авылында гомер итүче биш балалы Гөлназ белән Рәшит Гайнуллиннар.
Гөлназ тумышы белән күрше Карамасар авылыннан. Акхуҗага килен булып төшкәч тә, ике авыл арасында еш кына җәяү йөрергә туры килгән аларга.
— Юл озын, нәрсә генә сөйләшеп бетерәсең. Рәшит: “Ничә бала алып кайтырбыз икән?” — дип сораша. Үзебез ишле гаиләдә үстек. Мин, ике дә уйлап тормыйча: “Әни бишне тапкан. Без дә биш бала алып кайтырбыз”, — дим. Шул чакта уенын-чынын бергә кушып әйткән сүзләр фәрештәләрнең “амин” дигән сәгатенә туры килгән, күрәсең, — дип елмая 46 яшьлек Гөлназ.
2020 елда аңа “Ана даны” медале тапшырганнар.
18 яшеннән аш-су остасы булып эшләгән әңгәмәдәшем соңгы елларда клуб мөдире булып хезмәт куя. Эштән курка торганнардан түгел. Авыл почтасында хат ташучы вазыйфасын да башкара, кирәк чакта җыештыручыга да ярдәм итә. Бишенче баласын тапкач та, сабыйга 40 көн булуга, аны 10 яшьлек кызы Лилиягә калдырып, 3 елга якын фермада эшләгән.
— Берүзең генә биш баланы аякка бастырып булмый. Гаиләм — төп терәгем. Энесен, сеңлесен карарга кызым Лилия бик ярдәм итте. Әнием белән каенанама да зур рәхмәт. Үз әтиемне хәтерләмим, бик яшьли вафат булган ул. Балаларыбызның тигез гаиләдә үсүе бәхет, — дип сөйли Гөлназ.
Хөкүмәт ярдәме белән Гайнуллиннар бөтен уңайлыклары булган зур йорт салып чыккан. Олы уллары Рүзәлгә 22 яшь. Ул Апас аграр көллиятен тәмамлаган. Хәрби хезмәттән соң эшкә урнашкан. Икенче уллары Риназ армиядә, аның кайтуын көтәләр. Лилия быел IX сыйныфны тәмамлый. Наил мәктәптә укый. Ә Наилә I сыйныфка укырга керергә җыена.
— Наил белән авырлы икәнемне 4 айга кадәр белмәдем. Корсагым үсә башлагач, киста бармы икән әллә дисәм, бәбиебез булачак икән. Биш бармакның кайсын кыссаң да, авырта. Балаларым һәрберсе якын, аларны тигез яратам. Биш бала минем өчен күп кебек тоелмый, бергә бердәм булганда, авырлыклар да сизелми, — ди Гөлназ.
Гайнуллиннар күпләп мал-туар, кош-корт асрый. Ел саен Гөлназ 50 үрдәк, 50 каз сатып ала. Аларны үстереп, сата. Каз мамыгыннан мендәр ясап та бирә. Моннан тыш клубта эш бетми. Ансамбльләрен булдырганнар. Төрле бәйгеләрдә катнашып, призлы урыннар яулыйлар.
— Картаерга вакыт юк, гел яшәреп кенә йөрисе килә. Иртән күзне ачабыз, кичен ничек йомылганын да сизми калабыз. Кемдер көнен ничек уздырырга белми йөридер, ә миңа тәүлегенә 24 сәгать вакыт җитми, — дип елмая Гөлназ.
Балаларын алар кечкенәдән бер алманы бишкә бүлеп, барын да уртак итеп яшәргә өйрәткән. “Тәрбия ул баланы каршыңа утыртып, ниндидер кагыйдәләр өйрәтеп үстерү түгел, минемчә. Аларны хезмәт, үрнәк белән тәрбияләргә тырышабыз. Эшләгәнегез, өйрәнгәнегез үзегез өчен, дип үстерәбез. Олы улларым кечкенәдән көтү көтеп, үзләренә кирәк әйберне эшләп алды. Иң мөһиме — авырмасыннар гына, илләребез тыныч булсын”, — ди Гайнуллиннар.
Эльвира МОЗАФФАРОВА.
