Апас районы Каратун авылында яшәүче Радик Исмәгыйлев атларны хәзер күпләр эштә кулланырга түгел, ә күңел өчен асрый дип саный.
— Техника заманасы бит. Мини-трактор белән бәрәңге утыртабыз, сызганда мотоблок кулланабыз. Йорт эшләрендә атлар кирәкми дә. Алар янында рәхәтлек алам. Эшкә киткәнче, атларны ашатам, хәлләрен белешәм, алар белән сөйләшәм, — ди Радик абый.
Исмәгыйлевларны Каратунда тәмле казылык ясаучы буларак та беләләр. Монысы төп эштән кала бер шөгыль генә икән, Радик Исмәгыйлевның эшләре җитәрлек. Ул Каратун авыл җирлеге башлыгы вазыйфасын башкара.
Тайларны Чувашстанның Батыр районы Шыгырдан авылыннан алып кайталар.
— Ел саен алты-җиде айлык 5-6 тай алып, бер ел асрыйм. 2015 елда башта үзебезгә дип кенә казылык ясаган идек. Туганнар, танышлар ошатты. Сорый башладылар. Хәзер сатуга да әзерлибез. Ел саен 1000 таяк казылык җитештерәбез, — ди Радик абый. Ә тайның кабыргаларын ул күрше авылга барып ыслатып кайта. Үзенә бер тәмле ризык килеп чыга икән. Казылык ясауда һәркемнең үз сере бар. Исмәгыйлевлар да тәҗрибәләр аша аерым рецептларын булдырган.
— Атны суйгач та, җылы килеш итен ваклап турыйбыз. Аннары эмаль ваннага салып, өч көн тотам. Шунда сарымсак, борыч салам. Итне “йоклатырга” ярамый. Өч көн әйләндереп, болгатып торам. Бу вакытта бөтен тәмләткечләрне үзенә сеңдерә ул. Аннары итне махсус казылык ясый торган пресс аша чыгарабыз. Казылык тышчасын Мәскәүдән кайтартабыз, — дип сөйли Радик абый.
Казылыкны элеп куйгач, ул якынча 40 көн чамасы кибә. Монда билгеле бер дымлылык, температура сакланырга тиеш. Казылыкның 50-60 данәсен үзләренә калдырсалар, калганын саталар. Күпләп алучылар да бар.
— Хәзер мөмкинлекләр җитәрлек, шуңа да күп нәрсәне үзебез җитештерергә тырышабыз, андый ризык бәрәкәтле, файдалы була, — ди Радик абый.
Эльвира МОЗАФФАРОВА.
