Җәйнең соңгы аенда яңгырлар ява башлау белән гөмбә җыючылар күбәйде. Гөмбә файдалы, әмма җыя һәм эшкәртә белгәндә генә.
Агулану билгеләре нинди гөмбә белән агулануыңа да карый. Агулы гөмбә үзен 10-15 минуттан ук сиздерә башларга мөмкин, әмма күп очракта инкубация вакыты берничә сәгатькә сузыла.
Кайчак тәҗрибәле гөмбәчеләр дә агулана. Моңа гөмбәне дөрес эшкәртмәү дә сәбәпче була ала. Мәсәлән, кайбер кеше шартлы ашарга яраклы гөмбәләрне дә җыя. Зарарлы матдәләрен бетерү өчен, мондый гөмбәләрне суга салып торырга, берничә тапкыр кайнатып эшкәртергә кирәк. Икенче сәбәп: гөмбә агулы матдәләрне тиз сеңдерә. Экология начар булган урыннардан җыелган ашарга яраклы гөмбә дә агулыга әйләнергә мөмкин. Кайбер гөмбә спиртлы эчемлекләр белән ярашмый, моны истә тотарга кирәк.
— Гөмбә белән агуланганда, тиз арада ашказанын юдыртырга кирәк. Моның өчен 1,5-2 литр чиста су эчәргә була. Йотымлап түгел, 2-3 минут эчендә эчеп бетерергә. Аннан тел төбенә ике бармак белән басып, косып чыгарырга. Моны 3-4 тапкыр кабатларга. Шуннан соң 10 кг гәүдә авырлыгына 1 төймә исәбеннән активлаштырылган күмер эчәргә. Күмерне ваклап, 1 стакан суга кушып эчсәгез, нәтиҗәлерәк. Гөмбә белән агуланганда, ашыгыч ярдәм чакырмыйча булмый. Ашказанын юдырганнан соң, хәл яхшырган кебек булса да, агу канда кала. Интоксикация бавыр, бөерләрне зарарларга мөмкин. Хастаханәдә система куярга тиешләр, — диде табиб-диетолог Наталия Әхмәдуллина.
Гөмбә белән агулану билгеләре: косасы килү, диарея (тәүлегенә уннан артык бәдрәфкә бару), температура күтәрелү, косу, калтырату.
12 яшькә кадәрге балаларга, йөкле хатын-кызларга, картларга, ашказаны-эчәк тракты чирләреннән тилмерүчеләргә гөмбә зыянлы.
