Йортларда һәм фатирларда газ җиһазларына техник хезмәт күрсәтүгә бәйле килешүне 2024 елның 1 гыйнварына кадәр яңадан төзергә кирәклеге турында хәбәр чыккач, күпләр борчыла башлады. Бердән, моны башкарып өлгермисең икән, штраф көтә, алай гына түгел, газыңны өзәләр, дигән сүзләр таралды. Икенчедән, газ оешмаларында хасил булган су буе чиратлар күпләрдә, килешүне тиешле вакытка төзеп булмаячак, дигән шикне тагын да арттырды. Бу уңайдан редакциягә шалтыратучылар да күп булды.
“ИРТӘНГЕ СӘГАТЬ ӨЧТӘН ЧИРАТ АЛАЛАР”
Чаллыдан даими укучыбыз Роза апа, чират бик зур, дип зарланды.
— Бездә “Газпром” оешмасына кайчан барсаң да, су буе чират. Бу арада бигрәк мәхшәр иде. “Иртәнге сәгать өчтән килеп чират алдык”, — диючеләр дә бар. Мин, 70 яшьлек кеше, таң белән анда барып баса алмыйм. Техник күзәтү буенча килешүне яңадан төзер өчен дип бардым, әмма чират килеп җитү күренми дә. Халык нишләргә тиеш? Ник мондый очракларда тизрәк җайга салу өчен чара кылмыйлар? Оешма белән өй арасы ерак. Килешүне тапшыра алмыйча, һаман кире борылып кайту да рәхәт түгел, — ди Роза апа.
Шундый ыгы-зыгы килеп чыккач, чиратны киметү максатыннан, Чаллыда газ килешүләрен төзү өчен өстәмә 17 пункт ачылган.
Яңа федераль закон буенча, 2024 елның 1 гыйнварыннан йорт һәм фатирдагы газ җиһазларына техник хезмәт күрсәтү, ремонтлау эше белән бары тик газ бирү статусы булган компанияләр генә шөгыльләнә алачак. Татарстанда бу оешма — “Газпром трансгаз Казань” ҖЧҖ. Әлеге үзгәрешләрне Дәүләт Думасы депутатлары: “Газ — куркыныч чыганагы. Бу закон газ җиһазларына хезмәт күрсәтүне тәртипкә китерәчәк, эшнең сыйфатын күтәрергә, җилләткеч һәм төтенүткәргеч каналларның торышын контрольдә тотарга мөмкинлек бирәчәк”, — дип аклый. Карар кабул ителде. Әмма асылы аңлатылмагач, төрле сүз ишеткән халык газ оешмаларына ашыкты. Татарстанда 1,6 млн. физик һәм юридик зат газ җиһазыннан файдалана, дип исәпләнә. Чиратларның ни дәрәҗәдә зур булуын күз алдына китерү кыен түгел.
“ХАЛЫК ГАЗСЫЗ КАЛМАЯЧАК”
Килешүне 1 гыйнварга кадәр төзеп өлгермәсәң, ни була?
— 2024 елның 1 гыйнварына кадәр төзергә өлгермәгән очракта да, халык газсыз калмаячак. Килешүне 1 гыйнвардан соң да төзи алачаклар, — диде ТР төзелеш, архитектура һәм торак-коммуналь хуҗалык министры урынбасары Алексей Фролов. — Ил күләмендә йорттагы газ челтәрләреннән файдалануга бәйле килешүләрне бер оешмага тапшыру турында карар кабул ителде. Бу — федераль дәрәҗәдәге эш. 2024 елның 1 гыйнварына кадәр идарәче оешмалар килешүләрне яңартырга тиеш. Кайбер районнарда “Газпром трансгаз Казань” хәзердән үк милек хуҗалары белән дә яңа килешүләр төзи башлагач, аңлашылмаучанлык килеп чыккан. Физик затлар белән килешүне яңартуны ел дәвамында хәл итәчәкбез. Моңа карап кына беркем дә газсыз калмаячак. Бу мәсьәләдә бернинди ыгы-зыгы булырга тиеш түгел.
— Закон буенча, газ белән тәэмин итү газ җиһазына техник хезмәт күрсәтү килешүе кабул ителгән очракта гына башкарыла. Гражданнар моны сәбәпсез суза икән, аларга Торак инспекциясе тарафыннан кабат мөрәҗәгать ясала, — диде “Газпром трансгаз Казань” ҖЧҖнең генераль директор урынбасары Михаил Фролов, борчылмаска киңәш итеп. — Шул кисәтүдән соң да килешү төзелмәсә, 2 мең сум күләмендә штраф каралган. Газ бирүне туктатулары да ихтимал. Бу инде соң чик. Килешү төзү — һәркемнең бурычы.
Лилия ЙОСЫПОВА.
Газга техник күзәтү буенча яңа килешүне кемнәр төзергә тиеш? “Газпром трансгаз Казань” ҖЧҖнең матбугат хезмәте белдерүенчә, торак йортлар өчен 2023 елның 1 сентябренә кадәр төзелгән килешүләр белешмәдә күрсәтелгән вакыты чыкканчыга хәтле гамәлдә. Әлегә аны яңадан алыштыру кирәк түгел. Ә күпфатирлы йортларда яшәүчеләр аны 2024 елның 1 гыйнварына кадәр яңадан төзергә тиеш.
Нинди документлар кирәк?
Паспорт (паспортның фотолы һәм теркәлгән урын турындагы битләренең копиясе).
Шәхси йорт яки фатир — милек хокукына ия булуны раслый торган документ.
Техник күзәтүнең гамәлдәге килешүе.
Кирәкле документларны электрон почта аша да җибәрергә мөмкин. Адресы: dogovor@tattg.gazprom.ru. Ул чакта килешү автомат рәвештә төзеләчәк.
