Татарстанның һәм Башкортстанның халык артисты, виртуоз тальянчы, җырчы Фән ВӘЛИӘХМӘТОВ быелның март аенда таеп егылып, аягын сындырган иде. Катлаулы булган, ул әле дә тулысынча аякка баса алмый. Фән абый гаиләсе белән Башкортстанның Шаран районы Шаран авылында гомер итә. 18 гыйнварда 73 яшь тула.
— Фән абый, хәзер хәлегез ничек?
— Марттан бирле өйдә. Авырып ятудан да яманы юк. Әкренләп чыгып йөри башладым. Әмма җайлану бик әкрен бара шул… Әрнүле булды бит. Таеп егылгач, тора алмый яттым. Узып барган кешеләр ярдәм итте, торгызып, машинама утыртты. Шуннан рульдә үзем кайтып киттем бит әле. “Катлаулы сыну”, — диде табиблар. Шуңа тернәкләнү озакка сузылды. Аннан, яшь тә бар бит инде.
— Соңгы вакытта кайбер концертларда чыгышларыгызны күреп сөендек.
— Концертларга алып баралар, кайтарып куялар, дигәндәй. Баруы бер хәл. Сәхнәгә чыгып утыру, яңадан керү авыр. Һәм физик, һәм рухый якны күздә тотып әйтүем. Тамашачы каршына “ходунки” белән чыгасым килми, әмма әлегә башкача булмый. Вәгъдә иткәч, “Фән абый, килегез инде”, — дип сорагач, бармыйча да ярамый. Аннары бөтенләй дәшмәскә мөмкиннәр (көлә).
— Фән абый, үз йортыгыз белән яшисез. Мал-туар, кош-кортны күп асрый идегез. Хәзер нәрсәләр тотасыз?
— Сарыклар күп. Кәҗәләребез бар, сөт бирәләр. Кош-корт күп иде, аларын урнаштырдык. Язга хәтле җитәрлек ит әзерләдек.
— Аларны карарга да кирәк бит әле.
— Ул яктан хатыным Светланага рәхмәт инде. Малны ул карый, тиресне чыгара. Эше күп. Мин — азык ягын кайгыртучы гына, йортның “завхоз”ы. Элек тә шулайрак булды, хуҗалык эшләрендә бик катнашмадым. Гастрольләргә китә идем, йорт эшләрен гомер буе хатыным алып барды. Хәзер менә өйдә ятам, тик, теләсәң дә, булышып булмый.
— Вакытны ничек үткәрәсез, Фән абый?
— Түшәмгә карап ятам… Кыен. Телефоннан дусларбелән сөйләшәм. “ТНВ”, “ТНВ-Планета” каналларын караштырам. Элек телевизорны бик сирәк ача идем.
Лилия ЙОСЫПОВА.
