Бәрәңге сортлары тиз искерә, аны яңартып торырга кирәк. Бөтен бакчага җитәрлек яңартылган бәрәңге алу арзан түгел, шуңа аны орлыктан яңартып карагыз. Орлыкны бәрәңге алмасыннан үзегез әзерли аласыз. Хәзер бакчачылык кибетләрендә дә төрле сорттагы орлыклар сатыла.
Помидор үстереп караган кешегә бәрәңгене орлыктан үстерү авыр эш түгел. Тизрәк тишелсен өчен, орлыкларны стимулятор яки алоэ согында уята аласыз.
Уңдырышлы туфрак, ком һәм черемә катнашмасы әзерләгез, чир һәм корткычлар калмасын өчен, туфракны духовкада кыздырып яки кайнар су белән пешекләп алыгыз. Орлыкларны 3-5 см саен чәчеп, өстенә аз гына туфрак һәм ком катнашмасы сибеп күмдертергә кирәк. Пленка каплап, җылы урынга куегыз.
Бәрәңге орлыгы, гадәттә, ике атнада тишелә. Ике атнадан үсентеләрне мочевина эремәсе (10 л суга 1 аш кашыгы исәбеннән) белән тукландырырга киңәш ителә.
Ике чын яфрагы чыккач, аерым савытларга күчерергә була. Төп урынына күчергәндә, тамырларына зыян килмәслек савыт сайлагыз. Катыргыдан үзегез ясый аласыз. Чөнки бакчага чыгарганда, төбендә борчак зурлыгында бәрәңгеләре яралып өлгерә.
Апрельдән үсентеләрне чыныктыра башлагыз. Бакчага кыраулар куркынычы беткәч, май азагында күчерергә кирәк. Алга таба тәрбия бәрәңге үстергән кебек, төбенә өяргә онытмагыз.
