— Авыл зиратында каберләр арасында буш урыннар күренә. Ире үлгәч — хатыны, хатын үлсә, ире җәмәгатенең кабере янында урын алып куя. Бу дөресме? Ул буш җирне ничек карап торырга? Бу урынга дога укырга кирәкме?
Мәдинә апа, Самара.
Яшел Үзән районы Акъегет авылы имам-хатыйбы Фиргать хәзрәт БИКТАҺИРОВ:
— Безнең авыл зиратында да каберләр арасында андый буш урыннар бар. Мәрхүм туганнары янындагы урынны бау белән әйләндереп алучылар, чардуган куйдыручылар очрый. Үзең исән чакта кабер өчен җир алып кую тыелмаган. Бу эш күбрәк авыл җирендә киң таралган. Гадәттә, нәсел-ыруын бер җиргәрәк күмәргә тырышалар. Шәһәрдә андый тәртипне бик саклап тормыйлар. Мондый җирне карауның аерым кагыйдәләре юк. Бары чүп үләненә үсәргә ирек бирмәсәң хәерле. Үзеңә дип алган урынны карап, үләнен чабып торырга кирәк. Зиратларыбыз чиста-пөхтә булсын. Буш кабер урынына дога кылынмый.
