Редакциябезгә Азнакайдан Миңлегөл Хөсәенова шалтыратты. Күн мозаикасы белән чигү үзенчәлекләрен, үрнәкләрен газета битләрендә бастыруны үтенде. 77 яшендә булса да, кул эшләре белән шөгыльләнә. Чигә, тегә, бәйли, курчаклар, уенчыклар ясый.
— Кечкенә вакытта хастаханәдә озак ятып дәваланырга туры килде. Тик ятасы килмәгәндер инде, бәйләргә, чигәргә өйрәндем. III сыйныфта укыганда укытучыбыз: “Миңлегөлнең бирнәсе әзер инде”, — дип шаярта иде. Сайлаулар җитсә, чиккән эшләнмәләремне бүлмә бизәргә алып торалар иде. Хәзер, Миңлегөл
77 яшендә дә курчак белән уйный, дип шаярталар, — дип сөйли әңгәмәдәшем.
Кул эшләрендә төрле өлкәне сынап караган ул, агачтан эшләнмәләр ясаган, сәйлән дә үргән, тамбур белән дә чиккән. VI сыйныфта тегәргә өйрәнгән.
— Күрше Әкълимә апаның материал күтәреп кергәнен хәтерлим. Үзлегемнән күлмәк тегәргә өйрәндем. Моны күреп, башкалар да күлмәк сорап килә башлады, — ди ул, балачагын искә алып.
Миңлегөл апа тумышы белән Ютазы районыннан. Медицина көллиятен тәмамлагач, аны юллама белән Азнакайга җибәрәләр. Яшь белгеч район хастаханәсендә эшли. Балалар йортында шәфкать туташы вазыйфасын башкарганда, кул эшләре түгәрәге алып бара.
— Габдулла Тукай әсәрләрендәге барлык геройларны чүпрәктән ясап чыккан идем. Курчакларымны балалар бакчаларына таратып бетердем. Кайбер уенчыклар үземдә калды, — ди Миңлегөл апа. Аның беркайчан да эшләнмәләрен сатып биргәне юк.
— Уенчыкларымны, кулдан эшләнгән әйберләремне күңел өчен ясыйм. Курчакларым кемнеңдер күңелен күтәрә икән, минем өчен зур шатлык. Берсендә кунакка әтисез үскән бер бала килгән иде. Мин теккән аюга күз дә алмый карап тора бу. Бүләк итми булдыра алмадым. Хәзер ул малайның үзенең өч баласы бар, аюны минем төсем итеп саклый, — ди әңгәмәдәшем. Элек уенчыкларыннан, кул эшләнмәләреннән күргәзмәләр оештырган. Бер дә тик торганы юк Миңлегөл апаның. Буыннар язылсын дип, кулында йомгак булса да тәгәрәтә. 8 март бәйрәменә ел да күршеләренә чәйнек тоту өчен тастымаллар тегә торган булган, быел оекбашлар бәйләп бүләк иткән.
— Кул эше мине тынычландыра, зур рәхәтлек бирә, моны сүз белән генә аңлатып булмый, — ди Миңлегөл Хөсәенова.
Эльвира МОЗАФФАРОВА.
