Карбыз, кавын үстерүчеләр елдан-ел арта. Хәзер безнең климатка яраклашкан сортлар да күп, бакчачылар да остара бара, бер-берсеннән киңәшләр ала, тәҗрибә уртаклаша. Быел Апас районы Дәүләки авылында яшәүче Ринат Сәлимовның карбызы уңган.
— Карбызны 10 апрельдә чәчкән идем. “Скорик”, “Зеленая торпеда” һәм танышлардан алган түгәрәк сортны үстердем. Язның ничек киләчәген алдан белеп булмый бит, шактый озак өйдә үстерергә туры килде, сабаклары озынаеп сузыла башлагач, борчыла да башладым. 25 майда ачык грунтка чыгардым, әле көннәр салкынча иде, пленка астында үстерергә туры килде. 5-6 яфрактан соң очын чеметтем. Карбыз үзәк сабакта уңыш бирә, 2-3 сабакка җибәрдем, 3-4 җимшән барлыкка килү белән очын өзеп бардым. Шулай ук кырыйдагы ян сабакчаларын даими кисеп торырга кирәк, бу эшне 2-3 көнгә бер эшләргә туры килә.
Карбыз-кавынга берничә тапкыр кычыткан һәм бозау тизәген әчетеп сиптем. Башка ашламалар кулланмадым. Икесе дә җылы як үсемлеге, кызу яраталар. Быелгы җәй карбыз, кавын өчен бик үк кулай булмады, шулай да үстеләр, өлгерделәр. Беренче карбызны июль азагында өздек, эче кызыл, бик тәмле иде. “Зеленая торпеда”ның кайберләре 10 кг нан зуррак үсте. Аннан көн саен диярлек яңгырлар китте. Төннәр салкынча, әллә туфракта дым күп булу сәбәпчеме, тәмендә үзгәреш сизелә башлады. Күбесен җыйдым, чөнки ярыла башладылар, түгәрәк сортлар гына сабакта калды, алар алай ук зур үсми икән, — дип аңлатты Ринат.
Карбыз һәм кавынны янәшә утыртмаска киңәш итә бакчачы. Кавын суны бик яратмый икән, шуңа утыртканда ук кырыена туфрак өеп, төбенә генә су сибеп торырга, яфракларына, сабагына тидермәскә кирәк. Ә карбызга кызу вакытта көнгә 2-3 тапкыр су сибеп торган.
Роза НУРГАЛИЕВА.
