Рөстәм АСАЕВ: “УЛЫМНЫҢ ҖЫРЛАГАНЫН БЕЛМИ ДӘ ИДЕМ”

— Рөстәм абый, улыгыз да җырлый икән?
— Язын бер уйламаган җирдән улым Мөслим белән “Балалы солянка” концертында “Гармун моңы” җырын дуэт итеп башкардык. Миңа 15 яшемдә шундый дәрәҗәле концертлар залында чыгыш ясау тәтемәде, Мөслим өчен сөенеп бетә алмыйм. Улыма әлеге исемне кумирым, баритон тавыш иясе Мөслим Магомаев хөрмәтенә кушкан идем. Мөслим күбрәк гитарада шөгыльләнә, спорт төрләреннән волейболны үз итә. Аның җырлаганын белми дә идем, укытучысы ике ел элек, җырларга кирәк, дип әйткән.
— Сез төрле чараларда еш чыгыш ясыйсыз. Төп эш урынында нинди уңышларыгыз бар?
— Казан шәһәр филармониясендә эшлим. Хәзер спектакльләр куябыз. Оркестр белән дә шактый концертлар эшләргә өлгердек. Гөлшат апа Зәйнашеваны искә алу кичәсен, Ильяс Камалның бәйрәмен үткәрдек, “Кави-Сәрвәр” операсында җырладым. Рәшит Ваһапов концертлары белән дә Россия буйлап чыгыш ясыйбыз. Кыскасы, төрле жанрда эшли алу — зур шатлык! Бәйрәмнәргә, төрле чараларга чакырып торалар.
— Туган ягыгыз Башкортстанның Благовар районы Болышлы авылына еш кайтасызмы? Анда дин көчлеме?
— Еш кайтып булмый шул. Ләкин җай чыккан саен гүзәл табигатьле Болышлыма ашкынам. Ике ел элек әтием Мәҗит үлеп китте. Әнием Рәмзия, Аллаһка шөкер, исән-сау. Аңа 69 яшь. Авылыбызда мәһабәт бина — мәчетебез бар. Авылда вакытта үзем дә азан әйтәм. Ураза, Корбан гаетләренә мәчеткә халык күп җыела.
Рөстәм Асаев 5 яшьтән үзлегеннән гармунда уйнарга өйрәнсә дә, кечкенә чагында артист булырга хыялланмаган. Берара хәтта фермер булырга да теләгән. Казанга 2006 елның маенда килә. “Казан нуры” оркестры белән Рөстәм Яхинның “Киек казлар китә” җырын башкарып, шәһәр филармониясенә эшкә урнаша. Рөстәм Асаев татар, рус, башкорт, итальян, немец телләрендә җырлый.
Арыслан ГӘРӘЕВ.