Борычны кайчан чәчәргә, минем бик озак тишелә. Иртә өлгерешле сортлар тәкъдим итә алмассызмы? Теплицам юк.
Гөлинә, Казан.
Танылган бакчачы Франс ХӘЛИЛОВ:
— Борыч орлыкларына тизрәк тишелү өчен +25…+28 оС җылылык кирәк. Мондый температурада орлыклар 4-6 көндә тишелә. Шуннан түбәнрәк температурада, гадәттә, 12-14 көннән генә беренче шытымнары күренә. Борычны бакчага утыртырга 70-75 көн кала чәчәргә кирәк.
Баллы борычның иртә өлгерә торган сортлары:
“Винни Пух” — 105-110 көндә өлгерә. Борычлары ваграк, 60-80 граммлы. Тәбәнәк буйлы — 40-50 см.
“Нафаня” — 105-110 көндә өлгерә. Уртача зурлыкта, 140-160 грамм. Биек үсми, сабагы 40-50 см.
“Нежность” — 110-115 көндә өлгерә. Минем иң яраткан сортларымның берсе. Теплицада да, ачык грунтта да яхшы үсә.
“Толстый барон” — уртача өлгерештә. 110-120 көндә өлгерә, бик уңдырышлы, уңыш авырлыгыннан ботаклары сынмасын өчен, ике тапкыр казыкка бәйләргә туры килә. Борычлары эре, 350-450 грамм, ачык грунтта да яхшы үсә.
Үз бакчамда, нигездә, соңгы ике сортны утыртам.
