Яшел Үзән районының Түбән Урысбага авылында яшәүче Фәүзия апа Яруллина 74 яшендә машина йөртә. Беренче тапкыр 39 ел элек руль артына утырган булган.
— Ул чакта Калининградта яши идек. Ирем Равил кораб капитаны булып эшләде. 67 яшенә кадәр диңгездән аерылмады. Алтышар айга командировкага китә иде. Ике кызны тәрбияләргә кирәк, әти-әни бар. Кыскасы, җәмәгать транспортында уңайсыз булыр дип, машина йөртергә өйрәнергә булдым. Беренче автомобилебез “Москвич” иде, — дип искә ала Фәүзия апа. Ул үзе оста парикмахер булып эшләгән. Соңрак ире аңа кыйммәтле чит ил машинасы бүләк иткән.
— Иремнең диңгездән кайтуын 45 ел көттем. Йокысыз төннәр, борчылулар… Моны капитан хатыннары гына аңлар. Берсендә Равил идарә иткән кораб Атлантик океан уртасында шактый вакытка утырып калган иде. Ягулык юк, элемтә өзелгән. Равил, чарасызлыктан, Президент Владимир Путинга мөрәҗәгать итте. Ул вакытта көч-хәл белән ярга чыктылар, — дип сөйли әңгәмәдәшем.
Лаеклы ялга чыккач, Яруллиннар туган яклары Түбән Урысбага авылына күченеп кайта. Кызганыч, тынычлыкта, тигезлектә озак яшәргә насыйп булмый. Равил абый кинәт вафат була.
— Аны уйламаган бер көнем юк, хәзер дә диңгезгә генә киткән сыман. Ул миңа исем белән дәшми иде, аның өчен һәрвакыт “матурым” булдым. Гел: “Иң чибәре бул, һәрчак елмаеп йөр, затлы киен”, — дип әйтә иде. Мине Канар утрауларында да ял иттерде. Мул тормышта яшәтте. Рәхмәт аңа, — ди Фәүзия апа.
Әңгәмәдәшем хәзер “Рено Логан”да җилдерә. “Өлкән яшьтә кирәк җиргә таксида да йөри алам. Тик күрше авылга, туганнарга, кибеткә, гөмбәгә, җиләккә барсаң да, гел машина кирәк”, — ди. Кызлары кунакка кайтканда, аларны каршы алырга Казан аэропортына да китә. Ватылса, автосервиска мөрәҗәгать итә. Тәгәрмәчләрен алыштырырга күршеләре, туганнарының уллары ярдәм итә икән.
— Яшьрәк чактагы кебек кыюлык юк хәзер. Тизлекне сәгатенә 100 километрдан арттырмыйм. Алдан барган машинаны узганда да берничә кат уйлыйм, сак булырга тырышам. Әйтергә дә куркам, 39 ел эчендә бер тапкыр да юл кагыйдәсен бозган өчен штраф түләгәнем юк. Автомобиль йөртүче куып йөрмәскә, юл билгеләренә игътибарлы булырга тиеш дип саныйм. Ватылып калсаң, борчылырга, каушарга кирәкми. “Аварийка”ны кабызасың. Мәрхәмәтле кешеләр җитәрлек, машина йөртүчеләр бер-берсенә ярдәм итми калмый, — ди Фәүзия апа.
Эльвира МОЗАФФАРОВА.
