Әгерҗе районында туып-үскән 45 яшьлек Эдуард Шәймөхәммәтов велосипедтан кар көрәү җайланмасы эшләгән. Кечкенәдән техника белән кызыксынган әңгәмәдәшем бүген Удмуртия республикасы Ижау шәһәрендә яши. Ишегалды ачык һавадагы гараж сыман. Монда ни генә юк, барысын да үзе ясаган, трактор, утын яра торган җайланма, агач ботакларын ваклый торган машина, тагын әллә ниләр…
— Кечкенәдән тимер-томыр арасында мәш килә идем. Бабам техникага мөкиббән, уйлап табу сәләтенә ия булган. Бу талант миңа да күчкәндер, күрәсең. Башыма уй килгән саен, аны тормышка ашырырга тырышам, белгәннәремне 18 яшьлек улыма да өйрәтергә телим, — ди Эдуард.
Белгечлеге буенча ул — поезд вагоннарын тикшерүче, әмма эштән киткәч, техника ясау белән ныклап шөгыльләнә башлаган. Үзе эшләгән 4 тракторы бар, кайсы тәгәрмәчле, кайберсе чылбырлы.
— 3 сутый җирем бар. Аның кадәр техника миңа кирәк түгел. Шуңа да тракторларымны сатуга куям. Чылбырлы тракторны сораучылар аеруча күп, — ди Эдуард. Аның социаль челтәрләрдә, “Ютуб” каналында СССР (“Сделай Сам Своими Руками”) дигән каналлары бар. Анда ул кешеләрне яңа иҗат җимешләре белән таныштыра, техника серләренә төшендерә. Интернет киңлегенә чыккач, Эдуардны тирә-якта да белә башлаганнар. Ясаган техникасын сорап, Татарстаннан гына түгел, Киров өлкәсе, Удмуртиядән дә мөрәҗәгать итүчеләр күп икән. Велосипедтан кар көрәү җайланмасы эшләп, барысын да шаккатырган ул.
— Өйдә иске 4 велосипед ята иде. Уйладым да, әрәм булмасыннар дип, кар көрәү җайланмасы эшләргә булдым. Велосипедның алдына кар эттерә торган калай беркеттем. Велосипедның резиннары җәйге булгач, кышкы юлда кузгалып китү авыррак. Шуңа да карамастан, урамнарны кардан чистарттым. Күршеләр рәхмәт әйтте, — ди Эдуард.
Бер яктан, кар көрәп яхшылык эшләсә, икенчедән, бу сәламәтлек өчен дә файдалы. “Велосипед белән кар эттергәндә, аяк мускуллары Арнольд Шварценеггерныкы сыман ныгый”, — ди ул, елмаеп.
Эльвира МОЗАФФАРОВА.
