Кукмара районы Туембаш авылында яшәүче Сәетовлар гаиләсе рамазан ае уңаеннан йортларын бизәгәннәр.
— Рамазан — айлар солтаны. Мөселманнар өчен нәкъ менә дини бәйрәмнәребез беренче урында торырга тиеш. Гадәттә, яңа елга чыршы куялар, йортларны бизиләр. Рамазанны да шулай зурлап, бәйрәмчә каршы алырга кирәк, дигән уй ике ел күңелемдә йөрде. Быел менә форсат чыкты. Аллаһ ризалыгы өчен, капкага “Рамазан-2023” язуы урнаштырдык. Йортны утлар белән бизәдек. Алар икенде намазыннан алып иртәнгә кадәр янып тора, — ди Миләүшә ханым.
Сәетовларның йортлары мәчет каршында урнашкан. Миләүшә ханым үзе 17 ел мәдрәсәдә дин сабаклары укыта. Улы мәчеттә имам булып тора. Тәравих намазына килгән кешеләр дә, аларның йортын күреп, рәхәтлек алабыз, бер бәйрәм кебек, диләр. Миләүшә ханым: “Рамазанга йортны бизәү — беренче чиратта дәгъват. Уразаның мөһимлеген, мөселман өчен көтелгән бәйрәм икәнен башкаларга җиткерү ысулы да”, — дип саный.
Мәчетне дә матурлаган алар. Түшәмне көнчыгыш стилендә тарттырганнар. Утлар белән бизәгәннәр. Көн саен авыл халкы белән бергәләшеп ифтар ашы уздыралар. Туембашта дини халык яши. Авылда 150 дән артык хуҗалык исәпләнә. 93 кеше мәдрәсә тәмамлаган. Киләсе елга Сәетовларга башкалар да кушылырга уйлый. “Авылда рамазан аена иң матур бизәлгән йорт бәйгесен оештыру нияте бар”, — дип бүлеште Миләүшә ханым.
Татарстан мөфтияте оештырган “Нурлы Рамазан” бәйгесе кысаларында республиканың күп кенә кафе, рестораннары, кибетләр һәм сәүдә үзәкләре, салоннар, мәчетләр, уку йортлары бәйрәмчә бизәлде.
— 20 апрельдә Ураза гаете уңаеннан 180 метр биеклектәге Казан телевизион манарасы да бәйрәм утларын кабызачак. Бәйрәм төнендә манарада татар милли бизәкләре һәм Ураза бәйрәме язуы белән утлы шоу уйнаячак, — дип хәбәр итә Татарстанның Диния нәзарәте.
Эльвира МОЗАФФАРОВА.
