Груша утыртасым килә. Безнең якларда яхшы үсә, уңыш бирә торган сортлар белән таныштыра алмассызмы?
Фәнзия, Актаныш районы.
Сорауга авыл хуҗалыгы фәннәре кандидаты, ТРның атказанган авыл хуҗалыгы хезмәткәре Франс ХӘЛИЛОВ җавап бирде:
— Грушаның суыкка чыдамлыгы, алмагач белән чагыштырганда, түбәнрәк. Шуңа Урта полосада аны төньяк һәм төньяк-көнчыгыш җилләрдән сакланган урынга утыртырга кирәк. Татарстанда үстерү өчен иң туры килә торган сортлар: “Чижовская”, “Таежная”, “Красуля”, “Богатая”, “Краснобокая”. Билгеле, бездә үсә торган груша сортлары болар белән генә чикләнми. Үз бакчамда сынаган сортларны тәкъдим итәм.
“Чижовская” — җәйге сорт. Грушалары 120-140 грамм авырлыкта, яшел төстә, бик тәмле, авызда эреп тора. Бу сортның кышка чыдамлыгы югары.
“Таежная” — суыкка нык чыдам җәйге сорт. Грушалары эре түгел, 80-100 граммлы, сентябрь башында өлгерә, алтынсу-сары төстә. Үзлегеннән серкәләнми, пар кирәк. Аны “Уралочка”, “Северянка” сортлары яхшы серкәләндерәчәк.
“Краснобокая” — грушалары уртача зурлыкта, 120-150 граммлы, бик тәмле. Саргылт төстә, җиңелчә кызарып тора. Кышка чыдам сорт.
“Богатая” — иң тәмле груша, уртачадан эрерәк — 150-200 граммлы. Кышкы сорт, октябрьдә өлгерә, яшькелт-сары төстә, азрак кызарып тора.
“Красуля” — җәйге сорт, грушалары эре түгел, 90-100 грамм тирәсе. Өлгергәндә куе кызыл төскә керә, бик тәмле. Кышка чыдамлыгы уртача, кырыс кышларда берьеллык ботаклары өшергә мөмкин.
Фото: © marinatikhonova — 123rf.com
