Башкортстанның Борай районы Даутлар авылында яшәүче Флорис Шакиров 2010 елдан бирле фермерлык белән шөгыльләнә. Ул атлар үрчетә.
— Атлар бик талымсыз. Суыкка чыдам, салам да ашыйлар. Ат итен, казылыкны күп сорыйлар. Быел да җиткереп булмады, бик яратып алдылар, — ди тормыш иптәше Ания ханым.
Хәзерге көндә хуҗалыкта 41 ат бар. Ел саен 13 тай ит өчен үстерелгән. Атларны утарда асрыйлар, ашатырга печән дә, салам да җитәрлек. 400 гектар җирләре бар. Шуның 100 гектарында арыш чәчелгән, 150 гектар мәйданы көздән эшкәртелеп куелган. Техникасын да яңартып тора фермер. Орлыклары, ашламалары да әзерләп куелган.
— Келәттә 90 тонна арыш саклана. 2022 ел уңышлы булды. Шул арышны сатып, “Т-150” тракторы алырга исәплим. 70 гектар мәйданда агач баскан басуны чистартып, чәчү җире әзерләргә ниятлибез, — ди Флорис абый.
Аларга һәрвакыт ике уллары ярдәм итә. Ялларда кайтып булышалар. Тырыш гаилә казылыгын да үзе ясый. Шуның өстенә 70 баш умарта тоталар. Флорис абый кымыз эшләү белән шөгыльләнергә дә уйлый.
— Киләчәккә өмет белән яшибез. Дөньялар гына тынычлансын, — ди Ания ханым.
Альмира МӘҮЛЕТОВА. 
