Башкортстанның Әбҗәлил районы Амангилде авылы территориясендә “Аллаһу әкбәр”, “Сөбханаллаһ”, “Әлхәмдүлилләһ” дигән язулар урнаштырылган. Әлеге эш авыл халкы тырышлыгы белән башкарылган.
— Дини сүзләр язып, шундый “күрсәткечләр” ясау идеясе белән авылдашыбыз Иршат Атангулов чыкты. Ул диндә, мәчеткә бергә йөрибез. Улы Чечняда офицер булып хезмәт итә. Анда һәр торак пунктта шулай эшләнгән икән. Шуннан күреп кайтып: “Әйдәгез, бездә дә булдырыйк әле”, — дип тәкъдим итте, — дип сүз башлады Амангилде авылында яшәүче Рөстәм Юлмөхәммәтов. — Иршат Атангулов, язулы тамгаларны трассага урнаштыру өчен рөхсәт алырга дип, тиешле органнарга хат язды. БРның Юл хуҗалыгы идарәсе рөхсәт бирде. Районнан комиссия килде, кая урнаштырырга икәнен күрсәттеләр. Өч язулы тамга ясаттык. Бу эштә чыгышы белән Амангилдедән булган дустым Морат Искужин зур булышлык күрсәтте. Ул Уфада яши, эшмәкәр. Шундый язулар ясау белән шөгыльләнәләр. Авылыбыз исеменнән, бераз арзангарак эшләтеп булмасмы икән, дип сораган идек. Бушлай ясатып бирде. Зур рәхмәт аңа. Әзер булгач, язуларны Баймак-Уфа трассасының Амангилде территориясенә өч урынга — авылга кергәндә, урта өлешкә һәм чыгып киткәндәге җиргә урнаштырдык. Ул язулар хәзер авылыбызны бизи. Бу трассадан көне-төне машиналар йөри. Күреп узарлар. Башкаларга да үрнәк булыр.
Лилия ЙОСЫПОВА.
