Газетабызның актив укучысы — Яшел Үзән районының Норлат авылында яшәүче Розалия апа Ибраһимова тәрәзә төбендә кыяр үстерә башлаган. “Кызык өчен генә утырттым, үсеп китәрләр дип ышанмадым да, хәзер көн саен иртән чәй эчкәндә аларны күреп сөенәм. Кыярлары ашарлык булып өлгереп килә”, — ди Розалия апа. Март башында кибеттән сатып алган “Живая земля” туфрагына “Кураж” дигән сортлы кыяр орлыгы чәчкән. Яшелчә тиз тишелгән, бер ай дигәндә тәрәзәгә үрмәләрлек булып үскән. Кыярлары да күп булырга охшаган.
Розалия апа 20 елга якын миләүшә гөле үстерә. Кыярны быел беренче тапкыр сынаса, миләүшәләр буенча шактый тәҗрибә тупларга өлгергән.
— Яфрактан үрчеткәндә, миләүшә берничә төп булып чыга, көчлерәген сайлап алам. Чәчәк атуының сере — аны бер генә төп калдыруда, — ди Розалия апа.
Соңгы елларда, чәчәкләрне тукландыру өчен, 1 литр кайнап торган суга пычак очында бор кислотасы порошогы салып болгатылган катнашма куллана башлаган. Аны суытып сипсәң, чәчәкләр бердәм бәйләм булып ата икән. Су артык күп ярамый, гөлнең тамырлары черүе бар. Кояш нурлары турыдан-туры төшмәсә яхшырак.
— Вакытым булган саен миләүшәләремнең хәлен беләм, яфракларыннан сыйпыйм. Озак чәчәк атмасалар, “ачуланырга” да күп сорамыйм. Шуннан алар, мине аңлаган сыман, чәчәккә бөреләнә. 20 елдан бирле миләүшәләр мине үз итте бугай, — ди Розалия апа.
Җәй җитсә, Ибраһимовларның бөтен ишегаллары чәчәккә күмелә. Күпләр әңгәмәдәшемнән чәчәк үсентесе, гөл орлыклары сорап килә. “Розалиянең кулы җиңел, ул биргән гөлләр тиз үсеп китә, чөнки аның күңеле чиста, матур”, — ди авылдашлары.
Озак еллар китапханәче булып эшләгән Розалия апа лаеклы ялда да тик тормый, авыл тарихы белән кызыксына, социаль челтәрдә укучыларны кызыклы язмалары белән сөендерә. Газеталарны яратып укый. Оныкларын тәрбияли. Өйдәгеләрне тәмле ризыклар белән сыйлый.
Эльвира МОЗАФФАРОВА.
