Башкортстанның Кыйгы районы Колмәт авылында яшәүче Айрат Гомәровның йортын “Әкият дөньясы” дип атыйлар. Ул ихатасына нинди генә кош, хайван, балык ясап куймаган.
Айратка 46 яшь. Туган авылында төпләнеп калган. Һөнәре буенча электромеханик. Көньяк Уралда 12 ел шахтада эшләгән. Бүген күңеле теләгән шөгыльгә алынган.
— Балачактан әкият яраттым, шуңа да әлеге персонажларны ясарга булдым, — дип сөйләде ул. — Аларның саны 50 дән артты. Иң элек төзелеш кибетеннән 1,5х1,5 м үлчәмдә, 8 мм калынлыкта фанер сатып алам. Интернеттан карап, күңелемә хуш килгән җан иясенең рәсемен шунда ясыйм. Аннан электр лобзигы ярдәмендә кисәм, кырыйларын шомартам. Бер фанердан 5-6 эшләнмә чыга. Соңыннан лаклыйм, махсус буяу белән төрле төскә кертәм. Кипкәч, кадак белән йортның тышына, капкага, мунчага беркетәм. Хәзер ихатада урын бетте. Ләкин берсен дә сатмыйм. Аны ясау артык мәшәкать тудырмый, әллә нинди эш кораллары да кирәкми. Бары тик эшләнмәләрне ел саен буярга туры килә. Чөнки кояшта төсләре уңа, кайберсен ремонтлыйсы да була.
Айрат утын яра торган шәп корал ясаган.
— Авылыбызда газ юк, булмас та инде, — дип уфтанды әңгәмәдәшем. — Утын ягып көн күрәбез, кайчак электр да кулланабыз. Ел әйләнәсе 40 куб утын кирәк. Аны үзем кисәм, ярам. Тимер-томыр тапшырган җиргә барып, 7 см калынлыкта, 30 см озынлыкта тимер сатып алдым да конуслы борау ясаттым. Соңыннан аны 5,5 киловаттлы электр двигателенә урнаштырдым. Эшләргә бик җайлы, бер сәгатьтә 1 куб утынны яра.
Айрат гадәти булмаган куртка (ул аңа чуклар, төрле билгеләр, эмблемалар урнаштыра), чалбарлар да тегә. Хуҗалыкта 25 сутый җирне эшкәртергә, мал-туар (3 сыер, 2 бозау, 4 токымлы кәҗә) асрарга да өлгерә. Беренче никахыннан ике улы бар. Бүген бөтен эшне хәләл җефете Лена белән башкара.
— Исәнлек-саулык һәм теләк булса, әллә ниләр майтарырга мөмкин. Башыңны эшләтсәң, зур чыгым да китми. Аның каравы күңелгә ятышлы шөгыль белән көн үткәрәсең. Шул вакыт бу катлаулы тормыштан бераз булса да онытылып торасың. Нәтиҗәне күреп, җанга рәхәтлек аласың, — диде ул.
Эльмира СӘЛАХОВА.
