Әгерҗе районы Варкләд-Бодья авылында “Миклай ошмес” чишмәсе төзекләндерелде. Аны кое кебек эшләгәннәр.
— Варкләд-Бодья — удмурт авылы. Биредә 111 хуҗалык. Бик тырыш халык, күпләп мал-туар асрыйлар. Яшьләр дә авылда кала. Өмә эшләрендә алар бик актив, — дип сөйләде Көчек авыл җирлеге башлыгы Рөстәм Нурмөхәммәтов. — Чишмәне заманында колхоз умарталыгында эшләгән Николай Иванов карап торган. Алай гына түгел, үзе кизләүгә җан өрдергән кеше ул. Юеш урыннан казып, су чыгарган. Тик Николай абый бакыйлыкка күчкәч, әкренләп умарталар беткән, чишмәгә дә игътибар кимегән. Дөрес, кышын да бирегә сукмакны өзмиләр, тирәсен төзекләндереп торалар. Әмма тулысынча тәртипкә китерү өчен физик көч кенә җитми, яңарту шактый чыгым сорый. Бу урын изге, удмуртларның теләк әйтә торган җире. Авыл халкы теләген исәпкә алып, кизләүне торгызырга булдык. Район җитәкчелегенә мөрәҗәгать иттек. Башта күмәкләшеп территорияне чистарттык. Искеләрен кисеп, мәктәп балалары белән тирә-ягына агачлар утырттык. Бура төшердек, беседка, баскыч ясадык. Бик уңайлы, матур булды. Әлбәттә, матди як та бар. Күп чишмә нефтьчеләргә бүлеп бирелә, алар балансында тора. Без дә катнашырга булдык. Җиңдек һәм грант акчасын шушы максатта файдаландык. Чишмә Николай абый истәлегенә “Миклай ошмес” исемен йөртә. “Ошмес” — удмуртчадан “чишмә” дигәнне аңлата. Ачылышта Николай абыйның туганнары да катнашты.
3 июльдә биредә “Гырон быдтон” республика Сабан туен уздырачакбыз. Ул — удмуртларның иген уңышы сорап, илаһка дога кылу бәйрәме. Һәркемне үзебездә көтеп калабыз. Тәмле чишмә суыннан да авыз итәрсез!
Лилия ЙОСЫПОВА.
