Саба районының Сатыш авылында яшәүче Эльвира Галиева кечкенә улларына балалар бакчасына курчак тегеп алып бара. Шуннан аңа заказлар килә башлый, курчак тегү хоббиена әйләнә.
Эльвира тумышы белән Лениногорскидан. Байлар Сабасына кыз яшүсмер чакта гаилә белән күченгәннәр. Гимназияне тәмамлап, Казанда һөнәри көллияттә 3 ел белем алып, “Сәнгать бизәлеше эшләрен башкаручы” һөнәрен үзләштергән. Соңыннан Казан университетының сәнгать бүлеген яхшы билгеләргә тәмамлаган. Яраткан һөнәре буенча Саба районы сәнгать мәктәбендә сәнгать бүлеге укытучысы булып эшли. Эльвира Сатыш авылында кияүдә, тормыш иптәше белән 3 ир бала үстерәләр.
— Кул эшләрен кечкенәдән яраткач, һөнәремне шушы юнәлештә сайларга теләдем. Балаларымны да сәнгатьне сөяргә өйрәтәм. Курчакларымны һәрберсенә күңел җылымны биреп тегәм, — ди ул.
Бер курчакка якынча 4-5 көн вакыты китә икән. Тукымаларны ул махсус кибетләрдән сатып ала. Курчакның эченә тутыру өчен синтетик мамык, гәүдәсен, күлмәкләрен тегәргә — трикотаж, төрле тукымалар, бизәгечләр, аяк киемнәренә күн, төрле җепләр, төймәләр, чәч һәм битләрен ясарга акрил буяулар кирәк.
— Идея үзеннән-үзе килә. Курчак тегүнең кыенлыгын күрмим, аяк киеме генә бераз авыррак шикелле. Фоамираннан курчак әзерләргә телим.
Татар милли орнаментын кулланып, брошка, алкалар ясыйм. Брошкалар агачтан эшләнә, аларын кистерәм. Буяганнан соң, эпоксид сумала белән каплыйм, — дип серләре белән уртаклашты Эльвира.
Альмира МӘҮЛЕТОВА.
