Чүпрәле районы Зур Аксу авылында яшәүче Петр МУСКАТИНОВ исеме спорт сөючеләргә яхшы таныш. Ул — чаңгы ярышлары һәм армспорт (армрестлинг дип тә йөртәләр, өстәл өстендә бер кул белән махсус кагыйдәләр буенча көрәш) буенча Россия чемпионы! Коточкыч зур фаҗигагә тарып та, үзендә яшәргә көч тапкан, югары нәтиҗәләргә ирешкән ул! Хәзер Петр спорттан башка тормышны күз алдына да китерә алмый. Алда — тагын да югары үрләр, зур максатлар.
— Хәзер сентябрьдә Грузиянең Батуми шәһәрендә узачак дөнья чемпионатына әзерлек бара. Мин гел тренировкада, — ди спортчы.
Петр Мускатиновка 40 яшь. Башкалар кебек, аның да балачагында хыяллары зурдан була. Тик бөтен теләк-өметләрен җәйнең бер көне хәл итә. Барлык хыяллары челпәрәмә килә. 10 яшьлек малай урманда бозаулар эзләп йөргәндә мылтык корбаны була. Кем эше? Бу хәл ничек булган? Сораулар бүген дә җавапсыз… Ядрә умыртка баганасын зарарлый, Петрның ике аягы да хәрәкәтсез кала. Шул көннән ул инвалид коляскасында.
— Петр, балачакта кем булырга хыялландың?
— Спортчы!
— Алайса, хыялларың чынга ашкан икән!
— Йөз процент.
Әнә шулай башланды әңгәмәбез. Физик яктан сәламәтлегенә зур зыян килсә дә, теләкләренә болар киртә ясый алмаган. Петр — оптимист ир-ат. Фаҗигале көннәр турында искә төшерергә яратмый. Ә спорт хакында аның белән сәгатьләр буе әңгәмә корырга мөмкин.
— Аяклар йөрми дип, көне-төне тик ятып булмый бит. Кулларымны эшкә җиктем, башта, көч керсен, чыныксын дип, тренировкаларны өйдә генә ясадым, — ди Петр. — Гер күтәреп чыныга башладым. Мәрхүм әтием турник ясады. Хуҗалык эшләрендә дә булышырга тырыштым. Авыл җирендә хезмәт һәркемгә җитә. Аннары район үзәгендәге спорт залына йөреп, ныклап шөгыльләнә башладым. Тренерым — Казаннан Равил Мәсхут улы Галиуллин.
— Беренче ярышлар турында искә алыйк әле.
— Сабантуйларда турникта күтәрелдем. 50 шәр мәртәбә тартылдым. Районда алдынгы урыннарны алып бардым. Бу миңа физик кына түгел, рухый яктан да көч өстәде. Өй шартларында кулларны чыныктырып, армспорт буенча Татарстан чемпионатында катнаша башладым. Соңрак чаңгы ярышлары китте. Төрле вакыт булды. Күңелгә: “Әй, җитте, туктаргадыр”, — дигән уйлар да кергәләде. Аннан кабат үземне кулга алып, тагын дәвам иттем. 2015 елда Татарстанда узган армрестлинг буенча чемпионатта 1 нче урынны алдым. Шуннан соң Россия чемпионатында катнашып, алдынгы урыннар яулый башладым.
— Мондый нәтиҗәләргә ничек ирешеп була?
— Бикләнеп өйдә утырмаска! Алай үзеңне җиңеп булмый. Җиңүләр яулау өчен, хәрәкәтләнергә, тырышырга, көч куярга кирәк.
Петр тик утырырга яратмый. Спорттан тыш, аңа табигать кочагында булу ошый. Гөмбә, җиләк җыярга, балыкка йөрергә ярата. Гаиләсе дә шундый. Машинаны да үзе йөртә. Бер эштә дә кешедән ярдәм көтеп утырмый.
Петр спортта гына түгел, тормышта да зур җиңүләргә ирешә. Бүген аның иң зур бәхете — түгәрәк гаиләсе! Хатыны Анжелика белән туган авылында клубта таныша ул. Гаилә кору бәхетенә ирешә. Кыз ягы баштарак каршы булып карый. Әмма аларның мәхәббәтен аңлап, моның белән килешәләр.
— Балаларың да үз эзеңнән бара икән?
— Анжелика белән ике ул үстерәбез. Николай да, Владимир да спорт белән кызыксына. Олысына 10 яшь тула. Чаңгы һәм бадминтон белән ныклап мавыга. Улларымның вакытны бушка уздырмауларына куанам. Спорт белән чыныгып үссеннәр! Башкаларга да шуны киңәш итәм!
Лилия ЙОСЫПОВА.
