— Эльмира Хәмидовна, бүген циркның хәле ничек, ниләр белән янып-көеп йөрисез?
— Берничә елга план куеп эшләргә өйрәндек. 6 айдан, бер елдан циркта нәрсә буласын алдан беләбез. Бу тамашачыларга да җайлы. Халык фикере безнең өчен мөһим. Шуны истә тотып, хайваннарсыз тамашаларга игътибарны арттырдык. Казан циркының үз хайваннары юк. Дөрес, гастрольләр белән килгән хайваннарны вакытлыча асрарга шартлар тудырылган. Хайваннарсыз цирк — безнең өчен бөтенләй яңа формат. Быел шундый ике программа тәкъдим ителде. Кайтавазлар төрле. Кемдер моның нәрсә икәнен аңламый да калды. Икенче берәүләр бу гадәти булмаган мюзикл-спектакльләрне кабатлап күрсәтүне сорый. Киләсе елның маенда хайваннарсыз тамашаны Казан циркында кабат күреп булыр дип уйлыйм. Шулай да тамашачыларның күбесе классик циркка өстенлек бирә. Клоун, хайваннар чыгышы сагындырган. Циркта жанр төрлелеге булырга тиеш дип саныйм. Монда яшьләр, олылар, балалар да күңеленә ошаганын табарга тиеш. Циркның яңа логотибы, брендын таныту буенча эзләнүләр бара.
— Ни өчен тамашаны алып баручы балаларны татар телендә дә сәламләми? Татар колоритын кертеп, берәр программа әзерләргә уйламыйсызмы?
— Әлбәттә, бу хакта уйлыйбыз. Аның сценарие әзерләнә. 2023 елның сентябрендә ул тамашачыга тәкъдим ителергә тиеш иде, тик кайбер сәбәпләр аркасында соңгарак калачак. Әлеге программа татар фольклорына, әкиятләр, риваятьләргә нигезләнәчәк. Анда милли костюмнар, биюләр, татар моңы яңгыраячак. Татар колоритлы бу программа даими барачак.
Ә тамашаларда балаларны татарча сәламләүгә килгәндә, бу фикерне һичшиксез исәпкә алырбыз.
— Казан циркының үз мәктәбе бар. Аны тәмамлаучылар сездә каламы?
— Кызганыч, Казан циркы мәктәбе элекке нәтиҗәләрне бирми. Соңгы 5-6 елда укучыларның Россия күләмендәге бәйгеләрдә катнашканы, зур аренада чыгыш ясаганы юк. Югыйсә балалар да сәләтле, тырыша, укытучылар да көчле. Дөрес, мәктәптә уку да авыр. Бөтенесе ахырга кадәр түзми. Мәктәптә 5-14 яшьлек 180 бала белем ала, былтыр уку йортын нибары ике кыз тәмамлады. Бу өлкәдә мәсьәләләр җитәрлек. Мәктәптән соң балалар үз ирекләрендә. Кайберләре цирк училищесына укырга керә, икенчеләре шәхси студияләргә китә. Безнең максат — аларны үзебезнең циркта калдыру, кадрлар әзерләү. Талантларыбыз беренче адымнарын Казан циркында ясарга тиеш. Сүз уңаеннан, быел Яңа ел тамашасында үзебезнең цирк мәктәбе укучылары катнашында ике чыгыш әзерләнә.
— Билетлар ничә сумнан башлана, Пушкин картасы белән кереп буламы?
— Билет бәяләре 700 сумнан алып 1800 сумга кадәр. Аерым категория кешеләргә ташламалар каралган. Кызганыч, әлегә Пушкин картасы белән циркка билет алып булмый. Ләкин бу мәсьәләдә сөйләшү бара. Киләчәктә андый мөмкинлек булыр дип уйлыйм.
— Ел саен циркта Яңа ел бәйрәме уңаеннан махсус тамаша тәкъдим ителә. Быел нәрсә белән гаҗәпләндерәчәксез?
— 17 декабрьдән тәкъдим ителә торган “Морозко” Яңа ел тамашасының төп геройлары — казлар. Аларны Татарстан фермерларыннан эзләп таптык. Яңа ел программасы классик цирк түгел. Бу тулы шоу булачак. Анда 70 ләп кеше катнашачак. Актерлар, синхрон йөзү мәктәбеннән кызлар булачак. Мондый тамашаның Казанда беркайчан да булганы юк. Ул дуслык, мәхәббәт, игелек турында.
Төп максатыбыз — тамашачы циркта үзен бәхетле хис итәргә, азга булса да дөнья мәшәкатьләреннән арынып торырга, уңай кичерешләр белән кайтып китәргә тиеш.
Эльвира МОЗАФФАРОВА.
Казан циркына ташламалар
Бушлай: 3 яшькә кадәр сабыйлар, ятимнәр.
50 % ташлама: Чернобыль фаҗигасендә зыян күрүчеләр.
30 % ташлама: 14 яшьтән узган I, II, III төркем инвалидлары, хәрби хәрәкәтләрдә катнашучылар, ветераннар.
20 % ташлама: пенсионерлар, күп балалы гаиләләр, көндезге бүлектә укучы студентлар.
Туган көн уңаеннан 10 % ташлама каралган (документ белән расларга кирәк).
