Әлки районы Базарлы Матак авылында яшәүче Айдар Абдуллин ике ел инде сатуга күпләп лалә чәчәкләре үстерә. Аларның хәзер иң кызу эш вакыты — 8 мартка килгән заказларны үтиләр. Бөтен гаиләсе белән эшли алар, әти-әниләренә кушылып, өч балалары да мәш килә. Гади гаражы лаләләр патшалыгына әверелгән. Стеллажлар сатып алынган, махсус яктырткычлар куелган. Шактый күләмдә акча тотып, тәвәккәлләгән алар. Голландиядән лалә суганчаларын кайтартканнар.
— Җәй көне җиләк үстереп сатабыз. Кыш көне эш юк, әмма буш тормас өчен, яңа төр бизнес турында уйлый башладык, — дип сөйли Айдар. — Чаллыда яшәүче эшмәкәр белән берләшеп, суганчаларга заказ бирдек. 8 мартка өлгерсен өчен, технологияне төгәл үтәү зарур. Лаләләрнең суганчаларын чистартырга, теплицадагы температураны нормада тотарга кирәк. Башкалар Яңа елны бәйрәм иткәндә, без чәчәкләр утырттык. 2022 елда ассортимент ярлы иде, 3 сорт кына үстердек. Башта, алырлармы, чыгым үзен аклармы, дигән шик булды. Әмма чыбыксыз телефон ярдәмгә килде. Алып бетерделәр, тәҗрибә буларак башланган эш үзен аклады. Быел ассортиментны арттырырга уйладык. 9 сорт үсә, төсләре дә төрле. Былтыр кызыл һәм сары төсләр популяр булса, быел шәмәхә лаләләрне дә сораучылар бар.
Айдар әйтүенчә, беренче чәчәкләр заказ буенча китәчәк. Таратып йөрмиләр. Заказ бирүчеләр үзләре килеп ала. Калганнарын сатуга чыгарырга ниятлиләр.
— Былтыр 2 мең төп лалә утыртсак, быел 10 мең булды. Урыны кысанрак. Моннан тыш күп эш кул белән башкарыла. Әле кайбер хаталарны төзәтәсе бар. Мәйданны арттыру турында да хыялланам. Кемдер терлек асрап көн күрә, без бакчада эшлибез, — ди эшсөяр.
Лаләләр беткәч, чәчәк үсентеләре белән шөгыльләнергә ниятли Айдар. Петуния, бегония кебек гөл үсентеләре утыртырга планлаштыра. Ә аннан соң җиләк сезоны башлана. Кыскасы, эшләгән кешегә эш җитәрлек. Сүз уңаеннан, Айдар Базарлы Матак урта мәктәбендә физика укытучысы булып эшли.
— Авылга кайтуыма, мәктәпкә эшкә килүемә сөенәм. Авылны бик яратам. Балалар белән эшләү дә ошый, — ди ул. Тормыш иптәше Ландыш “Әлки хәбәрләре” район газетасында СММ-белгеч булып эшли. Өч бала тәрбиялиләр. Планнары зурдан, барысы да тормышка ашарлык.
Диләрә ГЫЙЛӘҖЕВА. 
