Розаны җәен ботактан үрчетеп буламы?
Гөлназ.
Роза НУРГАЛИЕВА, “Бакчачы почмагы” сәхифәсенең авторы:
— Үрмәләп үсә торган, куаклы розаларны үрчетү җайлы. Чөнки алар гөлҗимешкә ялгап үстерелмәгән, шуңа чыбыкчадан үрчетә аласыз. Хәзер розаларның икенче дулкын чәчәк атуы тәмамланып килә. Җиргә иң якын ботагын ияргә һәм бөгеп, ыргак белән эләктереп, уңдырышлы туфрак белән күмдерергә кирәк. Вакытында су сибеп торыгыз. Җиргә тиеп торган урыны тамыр җибәрәчәк. Киләсе елның августында аны, ана үсемлектән кисеп алып, теләгән урынга күчерә аласыз. Бу — иң җайлы ысул.
Шул ук вакытта чәчәк атып бетергән ботактан 15-20 см озынлыкта чыбыкча кисеп алып, тамырландырып карарга була. Өстә ике яфрак кына калдырып, астын чистартырга, кыеклап кисәргә. “Корневин”га манып алып, теләсә нинди тамырландыру стимуляторы кушылган суда тамыр җибәртергә һәм кечерәк чүлмәккә күчерергә. Көзгә тамырланган үсентене күчереп калдыра аласыз. Канада розаларын шулай үрчетәм. Алар -35 оСка кадәрге суыкларга түзә. Шулай да яшь үсентене кышка тиешенчә каплап калдырырга кирәк.
