Казанда яшәүче Алмаз Әлмиев инде биш ел үзе ясаган электровелосипедта сәяхәт итә. Ул Сочида, Башкортстан якларында да булырга өлгерде. Сәяхәт вакытында күргәннәре белән үзенең “Ютуб” каналында таныштырып бара. Бу юлы Алмазның сәфәре аеруча үзенчәлекле булды. Ул электровелосипедта әтисенең туган ягы, үзенең дә балачагы узган Яшел Үзән районы Акъегет авылына кайтты.
— Алмаз, бу электровелосипедны ничек ясадың?
— Кул астында нәрсә бар, шуннан әмәлләдем. Өйдә магнитофон шнуры ята иде. Аны электровелосипедның зарядкасын җыяр өчен җайланмага көйләдем. Зарядка 200 км га җитә. Аккумуляторны ике яктан ДВП такта белән тышланган сумкага урнаштырдым. Тәгәрмәч тырнагы (спица) “ИЖ” мотоциклыныкы. Кыскасы, бу велосипед 40 мең сумга төште.
— Балачак эзләре буйлап сәяхәт итү идеясе ничек туды?
— Авыл сагындырган, күрәсең. Бер айга сузылган иң озын, авыр сәяхәт Сочига булган иде, ул чакта көннәр эссе торды. Ә иң истәлеклесе, күңелгә рәхәт биргәне — балачак эзләре буйлап сәяхәт булгандыр. Ул өч кенә көнгә сузылса да, үткәннәргә әйләнеп кайтырга, балачактагы һәр көнне искә төшерергә ярдәм итте. Дәү әнием белән күрештем. Күптәнге танышларым белән очраштым. Уйнап үскән урамнар, иске ферма, чишмә, мәчет, туган нигез — бөтенесен дә барлап чыктым. Җәйге каникул гел авылда уза иде. Казан аша башта Яшел Үзәнгә, аннары паром аша Норлат авылына, шуннан Акъегеткә юл тоттым. Табигатьтә каенлыкта ашарга пешереп, кырда тау башында чатырда кич кунып, вакытны күңелле уздырдым. Бу сәфәр язылучыларыма да кызык булды, күбесе, балачакка кайткандай булдык, диделәр.
— Киләчәктә тагын кайларга барырга уйлыйсың?
— Карелия, Алтай, Байкал күленә, Грузиягә чакыралар. Күз күрер, иң мөһиме — исән-сау булыйк.
Эльвира МОЗАФФАРОВА.
