Эпоксид сумаласы аның кулларында гүзәллеккә әйләнә. Диңгез тематикасын чагылдырган үзенчәлекле сәгатьләр ясаучы — Башкортстанның Бөрҗән районы кызы Назгөл БИКМЕТОВА турында әйтүем. Хәзер ул Уфада яши. Аның сәгатьләрен илнең төрле шәһәрләреннән заказ бирәләр. Сумаладан сәгать ясау үзенчәлекләре турында Назгөлнең үзе белән сөйләштек.
— Назгөл, эпоксид сумаласыннан эшләнмәләр ясау белән ничек кызыксынып киттең?
— Мин кечкенәдән иҗатка гашыйк. Әтиемнең дә тәэсире булгандыр. Ул сынлы сәнгать белән кызыксына, матурлыкны тоя белә. Сумала белән очраклы рәвештә таныштым. Бер ел элек әни миңа сумаладан ясалган эшләнмәләр турында мәгълүмат җибәрде. Бу үзенчәлекле шөгыль мине шунда ук җәлеп итте. Икенче көнне үк интернет кибет аша эпоксид сумаласына, кирәкле материалларга заказ бирдем. Барысын да мөстәкыйль өйрәндем, интернеттан укыдым, форумнарда утырдым. Видеодәресләр карадым. Үз хаталарымда өйрәндем. Нәрсәдер килеп чыкмаганда, әлеге эшнең осталары булган кешеләрнең эшләнмәләрен карап үрнәк ала идем. Киләчәктә минем дә шундый кабатланмас стилем булачак, үз эшемнең остасына әйләнәчәкмен, дип үземә гел кабатлап тордым.
— Беренче эшеңне хәтерлисеңме?
— Бу эш күңелемә бик якын. Беренче сәгатемне ясагач та, фотосын социаль челтәргә куйдым. Күп тә үтми аны сатып алучы табылды. Ул эшемне шедевр дип бәяләде, мине илһамландырды, канатлар өстәде. Беренче эшем Мәскәүгә китте.
— Сәгатьләреңнең үзенчәлеге нидә?
— Сәгатьләремнең үзенчәлеге — гарәп телендә язылган сүзләр, Коръәннән сүрәләр диңгез тематикасы белән кушылган. Башта сәгатьнең нигезен эшлим. Аның өслеген тигезлим. Яр буен хәтерләткән сурәт ясыйм. Моның өчен диңгез комы, үзебезнең Агыйдел елгасындагы ташларны кулланам. Аларны үзем җыям. Аннары сумала ярдәмендә “диңгез”не тудырам. Төзелеш фены белән киптерәм. Сумаланың бер каты тәүлек дәвамында кибә, аны берничә кат агызырга кирәк. Эпоксид сумаласы сыек хәлдә сәламәтлек өчен зыянлы санала. 18 яше тулмаган балаларга, авырлы хатын-кызларга аның белән эшләргә ярамый. Эшләгәндә куркынычсызлык кагыйдәләрен үтәргә, битлек һәм перчатка кияргә кирәк. Ә каткан сумала зарарсыз. Ул пыяла йә пластикны хәтерләтә. Сәгатьләремдә тормыш кайнап торганны яратам. “Диңгез”гә көймәләр җибәрәм йә аларны яр буена чылбырга куям, балыклар йөздерәм, кабырчыклар белән бизим. Кайбер сәгатькә фосфор кушам, ул караңгыда янып тора. Бу — бик нечкә ювелир эш. Зур игътибар һәм сабырлык таләп итә. Тик миңа болар барысы да ошый. Бу эшләрне башкарганда, күзләрем яна, рәхәтлек тоям, кәеф күтәрелә.
— Сәгатьләрең кыйммәт торамы? Иң үзенчәлекле заказыңны хәтерлисеңме?
— Сәгатьләрне индивидуаль заказ белән ясыйм. Бер сәгать 5-7 мең сум тора. Бәясе катлаулылыгына һәм үлчәменә бәйле. Иң үзенчәлекле заказ диаметры 50 сантиметрлы бик зур сәгать иде. Ул 18 мең сумга төште. Оригинальлеге һәм катлаулылыгы ягыннан башкаларыннан аерылып тора. Аны 3 атна әзерләдем. Нәрсәләр генә уйлап чыгармадым. Яр буенда маяк, шарлавык, урман, диңгездә йөзүче кит балыклары, сулыклар дисеңме… Киләчәктә эпоксид сумаласыннан өстәл ясарга өйрәнәсем килә.
Эльвира МОЗАФФАРОВА.
