Нурлат районыннан Рәис абый Сафиуллин 45 елга якын машина йөртә. Былтыр республика күләмендә үткәрелгән бәйгедә 62 яшьлек әңгәмәдәшем иң яхшы машина йөртүче автобабай дип тә танылган иде.
— Юлда йөргәндә кагыйдәләрне истә тотарга һәм бик нык игътибарлы булырга кирәк. Юк кына нәрсә дә, әйтик, борылганда поворотникны кабызмау, зур фаҗигагә китерергә мөмкин, — ди ул. Машина озаграк хезмәт итсен өчен, аны гел карап торырга киңәш итә.
— Маен, куллану вакыты чыккан запас частьларны, түзә бит әле дип, ахыргача көтәргә түгел, вакытында алыштырырга кирәк. Капот астын ешрак карарга киңәш итәм. Элек машина ватылса, кеше үзе дә төзәтә ала иде, хәзер заманча автомобильне аңлар өчен электроника өлкәсендә белгеч булу кирәк, — ди Рәис абый.
Ул автомәктәптә 9 елга якын инструктор вазыйфасын да башкарган. Бу эш гомер өчен куркыныч булып санала, ди ул.
— 1980 елларда юлларда иркен иде. Бөтен урамга 1-2 машина булырга мөмкин. Ә хәзер бер гаиләдә икешәр машина, хәрәкәт тыгыз. Өлкән яшьтәге ханымнар да автомәктәпкә килә. Кайбер үзсүзлеләре белән эшләү аеруча авыр. Араларында үзләрен ничек өйрәтергә кирәклеген аңлатырга маташучылары да очрый, — ди Рәис абый, елмаеп. — Укытучылар, билгеле бер стаж җыйгач, “выслуга лет” белән пенсиягә чыга, ә бездә күпме эшләсәң дә, андый ташлама юк. Азга гына игътибарыңны читкә юнәлтсәң дә, юл һәлакәтенә очравың бар, куркыныч эш. Һәр кешегә имин юллар телим, — ди Рәис абый.
Эльвира МОЗАФФАРОВА.
