Казанда гомер итүче Нәфирә Игъламова гөмбәне урманнан бәрәңге чүпләгән кебек кенә җыеп ала. Таң атканчы аларны эшкәртә. Каен, нарат, майлы, баллы, ак, җирән, гөреҗдә гөмбәләре җыя. Соңгыларын 89 һәм 120 чиләк чистарттым, ди. Нәфирә ханым (41 яшь) 11 ел дәвамында гөмбә җыеп сата.
Нәфирә ханым тумышы белән Яшел Үзән районы Мамадыш-Әкил авылыннан. Һөнәре буенча пешекче. Бүген Казандагы бер балалар бакчасында склад мөдире булып эшли. Ире Фиргат белән бер кыз тәрбиялиләр. Фирүзә быел IX сыйныфта укый икән.
— Фиргат белән гөмбә җыеп кайтуга, кызым ашарга пешереп көтә, — дип шатланып сөйләде Нәфирә ханым. — Урманга күбрәк ирем белән барырга тырышам. Ул янәшәмдә булганда, күңелем тыныч. Адашырмын, каршыга берәр җәнлек чыгар дип тә куркасы юк. Гөмбәне Балык Бистәсе, Лаеш, Питрәч, хәтта Мамадыш якларыннан да җыябыз. Ә ак гөмбәгә Мари урманына юл тотабыз. Бер барганда 8-19 чиләк җыела. Августта ачылган сезон октябрьгә кадәр дәвам итә.
Өченче ел — 180, былтыр — 280, быел 400 мең сумлык гөмбә саттык. Яңгыр яуса, шатланабыз. Чөнки гөмбәгә яңгыр кирәк. Гөмбәне чалгы белән чабып алган еллар да булды. Бервакытта да гөмбәсез кайткан юк. Кешеләр аеруча җирән һәм майлы гөмбәне яратып ала. Гөмбәне юганда бик сак эш итәм. Төсен, тәмен югалтмасын дип тырышам. Аеруча ваклары матур саклана. Гөмбәне иң элек яхшылап юам, ике кат кайнатам, шуннан төрле тәмләткечләр салып, стерильләштерелгән банкаларга тутырам. Ирем капкач белән яба. Бу 12-15 сәгать вакытны ала. Гөреҗдәне озак юасы, җирән гөмбәне исә — тиз. “Ул кадәр гөмбәне ничек эшкәртәсең?” — диләр. Бер ияләшкәч, авырлыгын күрмим. Җайлы эшлим.
Эльмира СӘЛАХОВА.
