Эустомалар, әлбәттә, нәфис һәм матур, ләкин менә тәрбияләүдә һәм үстерүдә бик тә таләпчән. Экспериментлар ясарга ярата идем, шуңа күрә бу көйсез чәчәкне үземдә үстерергә булдым.
Эустоманы 2020 елдан үстерәм. Торфлы таблеткаларга чәчәм. Тишелеп чыккач та беренче вакытта капкачларын ачмыйм, парник эффектында тотам. Махсус лампа белән тәүлек буе диярлек яктыртам. Эустомалар тамыр үсешен тоткарлаганны ярата. Шундук зур савытка утыртмагыз, әкренләп зурайта барырга кирәк. Алда әйтүемчә, торфлы таблеткага чәчәм, аннан 50 мл лы стаканга күчерәм, 200 мл,
300 мл лы савытта үсә, шуннан соң гына даими урынына күчә. Кашпоны киң, сайны сайламагыз, тирән чиләкләргә утыртырга да киңәш итмим. Чөнки савытны тамыр белән тутырмыйча, өске үсеш булмый. 3-4 яфрак булуга, эустоманы 10-14 көнгә бер тапкыр кальций селитрасы эремәсе белән тукландырам.
Май ахыры, июнь башында вазонга яки уңдырышлы туфраклы түтәлгә күчереп утыртырга мөмкин. Даими су сибеп, төбен йомшартып, берничә тапкыр тукландырып торыгыз, болар барысы да бу искиткеч матур чәчәкнең чәчәк атуын тизләтәчәк.
Киселгән эустома чәчәге бик озак шиңми. Шуңа ул букетларда еш кулланыла.
Лилия ХАФИЗОВА, Чаллы.
