Башкортстанның Хәйбулла районы Акъяр бистәсендә яшәүче Лина һәм Азамат Колбулдиннарның йорт бүлмәсе оранжереяне хәтерләтә. Быел 3 мең төп лалә үстергәннәр. Бу төбәктә мондый бизнеска алар беренчеләрдән булып алынган. Халыкара хатын-кызлар бәйрәме — 8 март алдыннан әлеге чәчәкләргә ихтыяҗ зур, ди.
— Өч ел элек үз йортыбызга күченгәч, ишегалдын нинди чәчәкләр белән матурлау турында уйландым, — дип сөйләде хуҗабикә Лина. — Интернеттан күп укыдым. Шулай бервакыт кышын лалә чәчәкләрен үстерү хакында видеоролик күрдем. Кызыктым. Иремә тәкъдим иттем. Ике ел әзерләндек, ирем кирәк-ярак туплады, мин исә өй шартларында лаләне ничек үстерәсен интернеттан өйрәндем. Узган елның декабрендә 80 мең сумлык 3100 төп лаләне заказ биреп, Краснодар краеннан кайтарттым. Шуннан суганчаларны ике атна буе 5-7 оС җылыда мансардада тамырландырдык. 15 гыйнвардан исә температураны 15 оСка күтәрдек. Лаләләрне пычкы чүбе кушылган 32 тартмага утырттык. Пычкы чүбе дымны яхшы саклый. Суны көнаралаш сиптек. Яктылык күбрәк булсын дип, ирем махсус ут куйды. Лаләләрнең яфраклары чыга башлагач, һава йөрсен өчен, электр җилләткече дә урнаштырдык. Чөнки әлеге чәчәкләргә урам шартлары тудыру кирәк. Бүлмәдә саф һава тоту бик мөһим.
Аллага шөкер, лаләләребез шундый матур булып үсте. 60 см озынлыкта, бик эреләр. Кибеттә мондый сыйфатлы лаләләр табып булмый. Аларныкы икенче сорт — кыска, нечкә була. Без һәр көнне лаләләрне өзеп, суыткычка куябыз. Бүген аларны алырга теләүче күп. Хәтта Оренбургтан 600 лаләгә бронь ясадылар. Берсен 110 сумнан сатабыз.
Лина — иҗадый кеше. Җырлый, мәҗлесләр алып бара. Акъярда мәдәният йортында эшли, сәнгать мәктәбендә директор урынбасары вазыйфасын да башкара. Балаларга җыр дәресе дә укыта. Бүген декрет ялында. Төпчек уллары Миранга нибары 1 яшь.
— Аны карарга төнлә торганда, лаләләремә дә күз салам, — ди Лина. — Берсендә чәчәкләр булган бүлмәдә җылылык системасы сафтан чыкты. Урамда коточкыч салкын иде. Ирем белән таңга кадәр шуны җайладык. Чәчәкләр аздан гына үлми калды.
Чәчәк үстерү бик катлаулы, сабырлык таләп итә. Шуңа карамастан, бу эшне бик яратып башкарам. Чәчәкләрем белән сөйләшәм, аларга матур сүзләр әйтәм, җырлар җырлыйм. Киләчәктә лаләләрне 10 мең төпкә җиткерәсе килә. Моның өчен хуҗалыкта 12 метрлы теплицаны җайлаштырасы булыр. Шау чәчәктә утырган лаләләр тирә-юньгә матурлык өсти, күзне иркәлиләр, аларгә карап күңел сөенә.
Линаның урак өсте. Гортензия сезонын ачам, дип елмайды ул. Тиздән әлеге чәчәкләрне чыбыкчадан үстерүгә алына.
Эльмира СӘЛАХОВА.
