Минзәләдә гомер итүче Илназ Газизуллин ЮХИДИ башлыгы булып эшләгәндә, шактый хезмәттәшлек иттек. Аның алтын куллы кеше икәнен белә идем. Ул ни генә үстерми. Ел әйләнәсе теплицада кыяр, помидор, бакча җиләге өлгерә. Җәен бакчасында абрикос, персик агачлары җимеш бирә. Ишегалдында чәчәкләрнең ниндие генә юк. Күптән түгел Ватсапта аның шампиньон гөмбәсе куйганын күреп алдым. Ул аларны инде 5 ел үстерә икән.
Илназ Газизуллин тумышы белән Минзәлә районы Бакчасарай авылыннан. Хуҗәмәттә үскән. Балачакта кечкенә генә ике бүлмәле фатирда көн күргән егет үз хуҗалыгын булдыру турында хыяллана. Озак еллар Минзәләдә ЮХИДИ башлыгы булып эшләгән Илназ Акрамович бүген үзен тулысынча яраткан шөгыленә багышлаган.
— Эштән киткәч, төрле токымлы тавыклар, казлар, үрдәкләр асрадым. Кешеләр, музейга килгән кебек, безгә тавык күрергә керә иде, — дип искә алды ул. — Әмма күңелгә иң ошаганы гөмбә булды. Элек тавык тоткан 3х5 метр үлчәмдәге сарайны гөмбә үстерүгә көйләдем. Хәзер анда күп нәрсә автоматлаштырылган. Шампиньон гөмбәсен үстерү четерекле. Ул идеаль шартлар таләп итә. Дымлылык та, сибелгән су да, атмосфера басымы да тиешле дәрәҗәдә булырга тиеш. Пөхтәлек бик мөһим. Гөмбә җыярга кул юып, өскә чиста халат киеп керәбез.
Тонна ярым (30 мең сумлык) гөмбә спорасын Алабуга икътисадый зонасыннан барып алам. Мицелийларны утырткач, алар торган бүлмәне биш көн дәвамында җылытам, ике тәүлек әз-әзләп су сибәм. Шуннан температураны киметә башлыйм. Ул 17 оСка төшкәч, гөмбәләр баш калкыта башлый. Бик тиз үсәләр. Бер җыйганда 30-36 кг шампиньон гөмбәсе алабыз.
— Сатасызмы?
— Әйе. Килосын 280 сумнан сатам. Шампиньон гөмбәсе салам белән тавык тизәгендә үсә. Экологик яктан тулысынча чиста.
Әле гөмбә берничә тапкыр уңыш бирә. Беренче, икенче партияләренең уңышы күп була. Аннан кими.
Сөйләшү барышында Илназ Акрамовичтан җимеш агачлары турында да сораштым. Аның карлыганнары куак булып түгел, агач кебек утыра.
— Кызыл һәм кара карлыганны ялгадым, шуңа алар агач булып үсте, — дип аңлатты ул. — Абрикос белән персикны да сары слива агачына ялгадым. Аерым утыртсаң, алар 7 елсыз өлгерми. Ә ялгагач, икенче елга ук җимеш бирәләр.
Эльмира СӘЛАХОВА.
Газизуллиннар хуҗалыгында күзне иркәләрдәй матур күренешләр шактый. Илназ Акрамович ишегалдында күл ясаган һәм анда шактый балык җибәргән. Төнбоеклар астында йөзгән балыкларны күзәтү үзе бер ләззәт. Ә йортның кояшлы ягына өйгә терәп ясалган теплицада бүген дә җиләкләр пешеп утырганны күргәч, шәхсән минем авыз сулары килде.
