Азнакай районы Тымытык авылында яшәүче Әминә Ризванова өендә үзеңне әкият илендә кебек хис итәсең. Бүлмә саен аның күңел җылысын биреп эшләгән кул эшләнмәләре урын алган.
— Әминә апа, сез нинди һөнәр иясе?
— Балалар бакчасында тәрбияче булып эшли башлаганыма быел 44 ел була. Балаларны, үз эшемне бик яратам. Сабыйлар да янымнан китми, сагынып килеп җитәләр. Мин гади колхозчы гаиләсендә туып-үстем. Әти фермада, әни төрле эшләрдә булды. VIII-IX сыйныфларда җәен әнигә ияреп, чөгендер басуына китә идек. Ә кемнәрнең әниләре балалар бакчасында эшли, алар әниләрен ялга җибәреп, алмашка бакчага чыга. Шул чагында аларга кызыкканым хәтердә калган. Дөньяда иң бәхетле кеше — тәрбияче дип уйлый идем. 44 ел дәвамында мин иң бәхетле кеше булып чыгам. Ничек итсә иттем, хыялыма ирештем.
— Кул эшләнмәләрен нәрсәдән ясыйсыз?
— Күпчелек фоамираннан һәм салкын фарфордан эшлим. 10 ел элек интернеттан карап өйрәндем. Ул чагында инструментлар да юк иде. Интернеттан үрнәген карыйм да кибеткә материалга чабам. Кибеттә булмаса, интернеттан заказ бирәм. Полимер балчыктан муенсалар ясап саттым. Хезмәттәшемә ак төймәдән муенса ясап бирдем. “Әминә апа, рәхмәт, миндәге кебек төймәләр бер кешедә дә юк иде”, — диде. Менә шулай әйткәч, эшләргә канат куялар. Вакытым булганда, уенчыклар да бәйлим. Танышларым күргәзмәләргә дә кул эшләнмәләремне сорап тора. Хәзерге вакытта алмагач чәчәкләре ясыйм. 5-6 ботагы әзер инде. Киләчәктә аны зур бер картинага утыртып куясым килә. Үзем ясаган кыр чәчәкләрен берсендә Ватсапта сыйныфташлар төркеменә җибәрдем. Берсеннән-берсе җылы сүзләр әйттеләр. “Укыганда мондый һөнәрләреңне күрсәтми идең”, — диделәр. Без укыган заманда бәйләргә җеп тә юк иде. Кофталарны сүтеп бәйләгән чорлар әле дә күз алдында тора.
— Гаиләгез белән таныштырып китсәгез иде.
— Өч елдан артык үзем генә яшим. 2020 елның августында ирем Әнвәр йөрәк өянәгеннән үлеп китте. Һөнәре буенча музыка укытучысы иде. Мәктәптә, балалар бакчасында, мәдәният йортында баянчы булып эшләде. Заманында иремнең туган ягы Казахстанда бер ел яшәдек. Миңа климат килешмәгәч, Татарстанга күченеп кайттык. Эш булмагач, аптырап, милициягә урнашты. Анда 10 елдан артык хезмәт куйды. Бик гадел кеше иде. Йөрәгенә бөтен нәрсәне авыр алды, шуның белән китеп тә барды. Ике балабыз бар. Фәрхәд Казанда логист булып эшли. Кызым Илүзә кияүдә. Шулай ук башкалада яшиләр.
Арыслан ГӘРӘЕВ.
