Айгөл Нурисламова “Агропромпарк” комплексында туңдырма әзерләп сата. Әзерләү цехы да, сату ноктасы да бер үк урында. Туңдырмалары гади түгел, татар акценты белән ясалган, хәләл, “Әлбәттә” дигән бренд белән эшли. Мәтрүшкәле туңдырманы аеруча яратып алалар икән.
— Лимон, шоколад, фисташкалылары башка җирләрдә дә сатыла. Ә мәтрүшкә, җир җиләге белән — бездә генә! — ди Айгөл.
Айгөл Нурисламова чыгышы белән Саба районы Шәмәрдән бистәсеннән. Берничә ел читтә: башта Төркия, аннары Америкада яшәгән. Әмма туган як үзенә тарта, кире кайтырга була. Бизнеска керешкәнче, 16 ел дәүләт хезмәтендә эшли, Казан шәһәр Думасында оештыру бүлеге җитәкчесе була.
— Хәзер Мамадыш районында бер округта депутат булып торам. Анда инфраструктура буенча шактый эшләр башкарам, су керттердем, әле клубта идән алыштырырга җыенабыз, — дип сүз башлады Айгөл. — Ике балам бар. Тормыш иптәшем эш буенча 2020 елда Санкт-Петербургка күченеп китте, “Газпром”да хезмәт куя. Без исә монда калдык. Балаларның мәктәпне калдырып китәсе килмәде. Үзем дә, чит илдә яшәп кайткач, Казаннан китәргә теләмәдем. Балалар дип яшим. Туңдырма ясый башлавыма да алар сәбәпче. Төркиядә яшәгәндә туңдырманы бик ярата идек. Монда кайткач та, спортзалдан җәяү кайтканда, берничәшәрне сатып ала идек. Көн саен акча да шактый китә. “Ә нишләп әле туңдырманы үзем әзерли башламаска?” — дидем үзалдыма.
— Эш процессы белән таныштыр әле, Айгөл?
— Туңдырма ясау өчен җайланмаларны Италиядән кайтарттым. “Агропромпарк”та эшлим, бу — уникаль мәйдан, заманча, фермер, эшмәкәрләр өчен бөтен шартлар тудырылган. Көн саен иртән авылдан кәҗә һәм сыер сөте китерәләр. Бер генә фермер белән эшлим. Көненә чама белән 80 литр сөт сатып алам. Эссе вакытта туңдырма бик тиз сатылып бетә. Яңгырлы, салкынча көннәрдә бераз ял да итәбез. Ясый-ясый төрле тәмне татып карап, бер дигән туңдырма килеп чыкты, дип саныйм. Төп состав сөт, коры сөт, каймак, атланмай, җиләк-җимеш, шикәрдән тора. Бераз гына стабилизатор салам. Мәтрүшкә, җир җиләге, лимон, фисташка, карлыган, шоколад… — барысы 12 төрле тәм белән туңдырмабыз бар.
— Туңдырма ни өчен “татар акценты белән” дип тәкъдим ителә?
— Кулланган бөтен ингредиентларыбыз, стабилизатордан кала, Татарстанда җитештерелгән. Сыерлар безнең болын чирәмен ашап сөт бирә. Мәтрүшкә, бөтнек, җир җиләге дә үзебезнең болыннардан җыелган. Катыра-йомшарта торган әйберләр, буяулар кулланмыйбыз. Бар да табигый. Хәләл сертификатым бар. Туңдырманы моннан кала, Кремль территориясендә һәм тагын бер-ике ноктада сатабыз. Анда туристлар күп йөри. Аларның нәкъ менә бездә эшләнгән туңдырманы авыз итеп карыйсы килә.
— “Әлбәттә” исеме ничек барлыкка килде?
— Туңдырма ясый башлагач, татарча үзенчәлекле исем куясым килде. Блогерларга: “Исем табыгыз әле”, — дип заказ бирдем. Төрлесен әйтеп карадылар. “Менә, ул бит шулай…” — дигән идем. Бер блогер: “Әлбәттә, дөрес әйтәсез”, — дип матур итеп җавап бирде. “Әлбәттә” сүзенә шундый акцент ясады, ә мин тоттым да шуны алдым. Позитив, уңай, татарча сүз! Ул, ничектер, тормышыма да яхшы йогынты ясады. Хәзер берәр кешедән нидер сорасам: “Әлбәттә”, — дип елмаеп җавап кайтаралар.
— Бәяләр ничегрәк?
— 80 г туңдырма — 150 сум. Сыйфатлы, табигый туңдырма арзан була алмый. Әзерли башлаудан алып сату ноктасы туңдыргычына китереп куйганчы, чама белән 12 сәгать вакыт уза. Ничек әзерләгәнемне клиентлар да күрә. Цех стеналары пыяладан эшләнгән. Эшемне бик яратам.
“Агропромпарк”та туңдырма сату ноктасының бер як стенасына татар бизәкләре ясалган. Түшәмгә бәйләм-бәйләм мәтрүшкәләр эленгән. Алар хуш ис биреп, авылны, кыр-болыннарны искә төшерә. Ике өстәл һәм урындыклар да куелган. Базарда йөреп арысаң, берәр туңдырма сатып алып, кофе эчеп, ял итеп китәргә була.
Лилия ЙОСЫПОВА.
