«Рурайам” дип язылган безе тортын күргәнегез бардыр. Аны Кукмарада яшәүче Рузилә һәм Райнур Газизовларның кондитер эшләнмәләре компаниясе җитештерә. Ни өчен Рурайам? Ул Руайам исемле галим белән бәйле икән. Райнур хәзрәт Газизов бу галимнең хезмәтләре белән күптәннән таныш. Исеме матур, яңгырашлы да булгач, ул үзләренең компаниясен шулай атарга була. Аннан, гаилә әһелләренең өч исеменең беренче иҗекләре дә туры килеп тора.
“Рурайам” — җайлап кына Россиянең сату базарына кереп баручы, Татарстанны, Удмуртия, Чувашстан, Мари Илен генә түгел, Ульяновск, Мәскәү, Түбән Новгородта яшәүчеләрне дә гаҗәеп безесы, тәмле тортлары белән үзенә җәлеп иткән компания. Ике ел элек “Верный” сату нокталарына “чыксалар”, күптән түгел “Пятерочка” кибетләр челтәре белән үзара хезмәттәшлеккә кул куелган.
Мең тавык, мең йомырка
Зур Кукмарадагы йортларына күчеп килгәнче, Газизовлар иң элек каралты-кура җиткереп, анда 300 баш сарык асрыйлар. Корбан өчен үстерелгән сарыклар бик тиз ияләрен таба. Әмма Райнур хәзрәт моның белән генә тукталып калмый. Сарыктан бушаган абзарларга мең тавык кайта. Дөресрәге, берәүдән кайтарылырга тиешле 200 мең сум акча, башкача алу чарасы калмаганлыктан, тавыкка әверелә. Ә тавык көн саен берәр йомырка сала. Аны кая куярга?
Райнур хәзрәтнең яңа бизнесы турында ишеткәннәрнең чиләкләп йомырка алулары да ярдәм итми башлый. Шул чакта хәзрәтнең күңелендә балачак хатирәсе яңара. Бервакыт туган тиешле апаларына кунакка баргач, Райнур үз гомерендә беренче тапкыр безе тортын авыз итә. Шулкадәр ошата ул аны, озак еллар шундыйны эзли. Әлеге вакыйга исенә төшкәннән соң, Райнур хәзрәт йомырканы урнаштыру юлын таба. “Әнкәсе” (тормыш иптәшенә ул шулай дип дәшә) белән киңәшләшкәч, Газизовлар торт әзерләүне башлап җибәрергә ниятли. Ике чит ил машинасын сатып, беренче мич алына һәм кондитер эше башланып китә. Үзләре 25 мең сумлык “Жигули”га утыра.
Сүз уңаеннан, гаилә бүген дә сарыклар асрый. Алар өчен төп җаваплы кеше — 12 яшьлек Мөхәммәтәмин. Мал карау аның өстендә. Сарык саткан акчасына ул быел гомрә хаҗына барган һәм әнисенең 35 яшенә 60 мең сумлык кер юу машинасы бүләк иткән. Үзенең квадроциклы да, сеңлесе Сөембикәгә велосипеды да шул “касса”дан түләнгән.
70 мең торт
Компания бер айга шул кадәр өч төрле торт җитештерә. Әмма аңа килү юллары катлаулы була. 2018 елдан башлап 8 ай дәвамында безе өчен үзләре теләгән рецептны эзли алар. Бу бит никадәр хезмәт, әрәм йомырка, шикәр комы дигән сүз! Һәм табалар: “Рурайам” безесы — кулга тоткач, ватылмый, ә авызга кабуга эреп китә торган гаҗәеп тәмле, үз патенты булган продукт. Аның составындагы йомырканы (безе ясауда йомырка агы зур роль уйный икән) Газизовлар хәзер Башкортстанның Бакалы авылыннан кайтарта. Анда тавыкларга сөяк оны түгел, ә бары табигый ризыклар — торф, яшел үлән ашатыла, диләр. Цехта көн саен 6 меңләп йомырка тотыла. Безе өчен туңдырма тәме килеп торган, сыйфатлы крем ясарга өйрәнгәнче дә шактый атланмай, куертылган сөт чүп савытына китә. Ә хәзер әнә куертылган сөт тә кооперативның үзенеке.
Башлангыч чорда ике кондитер цехында 16 кеше эшләп, көненә 1500 данә “Рурайам” безе торты, 200 килограмм “Венские вафли” җитештерелә. Биш елда эшчеләр саны 40 кешегә җитә, көн саен 7 йөк машинасы тауар төяп юлга чыга. Хезмәткәрләрнең дә эш хакы зарланырлык түгел.
— Ни өчен ассортиментны арттырмыйсыз, дип кызыксынучылар күп. Безнең төп максат — сыйфатлы, тәмле ризык җитештерү. Көндәлек тауарыбыз сатылып бетеп бара. Иң “куркыныч” бәйрәмнәрнең берсе — 8 Март, чөнки торт җиткереп булмый, — дип елмая Райнур Газизов. — Шөкер, дәүләттән бер тиен ярдәм алмыйча, бары инвесторлар белән генә эшлибез. Шулай ук уңайлы, заманча техника белән эшләү дә төп бурыч. Әйтик, 2,5 сәгать дәвамында безе киптерә торган мич элек 550 мең сум торса, хәзер 700 мең сумга җитте. Бездә алар — 9, шушы көннәрдә тагын берәү кайта.
Йомырканың сарысы да әрәм булмый. Компаниянең икенче бер цехында алардан тәмле шоколад белән капланылган “Хаввас” суфле торты, Кукмара балы кушып, табигый куертылган сөттән ясалган крем сыланган күпкатлы “Рурайам” торты эшләнелә. Бер көнгә 100 килограмм “Венские вафли” ясалганда да тотыла.
Атнаның һәр көне бүлеп куелган
Кыскасы, һәрнәрсәнең исәбе бар. Ничә данә йомырка тотылган, күпме шикәр комы, шоколад киткән, никадәр атланмай, он, куертылган сөт салынган, ничә калай безе киптерелгән, күпме данәдә торт, печенье эшләнелгән — бөтенесе көндәлек исәп-хисапта язылып барыла. Әле бу исемлеккә цехларда атнага берничә була торган экскурсияләр һәм һәр килүчегә бушлай бирелә торган безе торты кермәгән. Сатып алучылар арасында Ураза гаете алдыннан кыйммәтле чит ил машинасы уйнатулары да — күркәм гадәт.
Райнур хәзрәт барысына да ничек өлгерә икән? Җавабы әзер: атнаның һәр көне бүлеп куелган: дүшәмбе — цехта булу, сишәмбе, пәнҗешәмбе — сораулары булганнарны кабул итү, чәршәмбе — сәфәргә чыгу, җомга — дини мәсьәлә, шимбә — яшүсмерләр өчен тренинглар, якшәмбе — ял көне.
Вакытны дөрес итеп бүлгәч, гаилә, балалар тәрбиясе дә читтә калмый. Җәй җиткәч, тәм-томнар алып, балалар белән походка чыгарга да өлгерә ул. Махсус программасы да юк, максат — артыгын “сикермичә” генә берәр кызыклы маҗара эзләп йөрү. Телефонны читкә куеп, йокы алдыннан ике кызы, улы белән эчкерсез сөйләшеп алу да — көндәлек эш, көндәлек тәрбия.
Җитәкчесенең аек акыл белән һәрнәрсәне алдан планлаштыру нәтиҗәсендә, бүген “Рурайам” компаниясенең эше гөрләп бара. Әле без бу компания турында киләчәктә дә күңелле яңалыклар ишетербез.
Лилия НУРГАЛИЕВА.
